Një shtetas britanik 38-vjeçar ka humbur jetën në Turqi, pasi iu nënshtrua një transplanti flokësh në një klinikë private në Stamboll.
Sipas mediave turke, ai kreu ndërhyrjen në klinikën “CINIK” në zonën Beşiktaş. Ndërhyrja zgjati pesë orë dhe fillimisht nuk pati komplikacione të menjëhershme, por pak pas përfundimit të saj, pacienti nisi të ndjejë shqetësime serioze.
Ai u transportua me urgjencë në një spital të afërt, ku u vendos në kujdes intensiv, por pavarësisht trajtimit mjekësor, ndërroi jetë pak më vonë.
Autoritetet turke kanë nisur hetime për ngjarjen, ndërsa trupi i viktimës është dërguar në Institutin e Mjekësisë Ligjore për autopsi përpara se të kthehet në Mbretërinë e Bashkuar. Hetimi po shqyrton mundësinë e një “vrasjeje nga pakujdesia”.
Një zëdhënës i Zyrës së Jashtme të Mbretërisë së Bashkuar konfirmoi për “Metro” se janë duke asistuar familjen e të ndjerit dhe janë në kontakt me autoritetet lokale.
Turqia është shndërruar vitet e fundit në një nga destinacionet më të njohura për turizmin estetik, për shkak të çmimeve më të ulëta dhe afërsisë me Britaninë. Vlerësohet se rreth 60% e transplantimeve të flokëve në mbarë botën kryhen në Turqi, ndërsa vetëm në vitin 2022, mbi 150 mijë britanikë udhëtuan drejt këtij vendi për ndërhyrje estetike.
Megjithatë, disa raste kanë përfunduar me komplikacione të rënda ose pasoja fatale. Në një tjetër rast të raportuar më herët, një student francez 24-vjeçar i dha fund jetës pas një transplanti të mjekrës që rezultoi i dështuar, ndërsa ndërhyrja ishte kryer nga një agjent imobiliar që pozonte si kirurg.
Autoritetet turke nuk kanë dhënë ende detaje shtesë mbi ngjarjen. Klinika ku ndodhi ndërhyrja nuk ka reaguar publikisht.