Këshilli Administrativ i Institutit të Sigurimeve Shoqërore ka miratuar tavanet buxhetore për periudhën 2026–2028, me një fond prej 204 miliardë lekësh për vitin 2026, ose 11.7 miliardë lekë më shumë se në vitin 2025.
Sipas llogaritjeve, nëse kjo shtesë shpërndahet proporcionalisht, çdo pensionist do të përfitonte mesatarisht rreth 16,220 lekë më shumë në vit, që përkthehet në rreth 1,350 lekë shtesë në muaj.
Statistikat e ISSH-së tregojnë se në fund të vitit 2024 kishte 721,398 pensionistë në total, nga të cilët 607,567 marrin pension pleqërie, 65,926 pension invaliditeti dhe 47,905 pension familjar.
Megjithatë, kjo shtesë shihet si minimale, pasi nuk mbulon as çmimin e një shporte ushqimore mujore. Pensionistët kanë theksuar se pensionet aktuale mezi u mjaftojnë për ilaçet bazë dhe rritja prej 1,350 lekësh mbetet kryesisht simbolike, pa e përmirësuar realisht jetesën e tyre.
