Të paktën 17 persona kanë humbur jetën dhe rreth 150 të tjerë janë plagosur në kryeqytetin e Nepalit, Katmandu, pas përplasjes së dhunshme mes protestuesve dhe policisë për vendimin e qeverisë që të bllokojë 26 rrjete sociale, mes tyre Facebook, X dhe YouTube.
Ngjarja ndodhi të hënën, kur turma të mëdha kaluan gardhet e sigurisë dhe rrethuan godinën e parlamentit. Policia u përpoq t’i ndalte me gaz lotsjellës, ujë dhe madje edhe me armë zjarri, por u detyrua të tërhiqej, pasi protestuesit ishin më të shumtë në numër.
Turmat brohorisnin: “Ndalo korrupsionin, jo rrjetet sociale!” ndërsa valëvitnin flamuj kombëtarë.
Autoritetet kanë konfirmuar se 145 persona janë plagosur, mes tyre edhe 28 oficerë policie. Për shkak të situatës së rëndë, është vendosur një orë policore në disa zona kyçe të qytetit, përfshirë parlamentin dhe rezidencën presidenciale.
Protesta është cilësuar si “revolta e brezit Z”, duke qenë se pjesa më e madhe e pjesëmarrësve ishin të rinj.
Qeveria e Nepalit thotë se platformat nuk kanë pranuar të regjistrohen zyrtarisht në vend, ndonëse janë paralajmëruar disa herë, dhe se shpesh përdoren për identitete të rreme, gjuhë urrejtjeje dhe lajme të rreme.
Ndërkohë, aplikacione si TikTok e Viber kanë kryer regjistrimin dhe vazhdojnë të funksionojnë normalisht.
Një projektligj i ri është paraqitur për debat në parlament me synim që rrjetet sociale të menaxhohen “në mënyrë të përgjegjshme e llogaridhënëse”, por kritikët e kanë cilësuar atë si mjet për censurë dhe kufizim të lirisë së shprehjes.
Në vitin 2023, Nepali kishte ndaluar përkohësisht edhe TikTok, me arsyetimin se dëmtonte “harmoninë shoqërore”, por ndalimi u hoq pas zotimeve të kompanisë për respektimin e ligjeve vendase.
