Një ngjarje e rëndë ka tronditur Parisin, ku një turiste amerikane vetëm 18 vjeç ka hedhur foshnjën e saj të porsalindur nga ballkoni i një hoteli.
Sipas raportimeve, e reja kishte lindur fëmijën në dhomë dhe pak minuta më pas e hodhi nga dritarja e katit të dytë të hotelit “Ibis Styles”, pranë Rue de la Croix Saint-Simon.
Foshnja u gjet pa shenja jete, ende me kordonin e kërthizës të pandarë nga trupi.
Shërbimet e emergjencës u thirrën menjëherë në vendngjarje rreth orës 6 të mëngjesit dhe transportuan fëmijën në spitalin “Robert Debré”, por mjekët konfirmuan vdekjen. Zona u bllokua për afro pesë orë ndërsa policia zhvillonte veprimet hetimore.
Autoritetet franceze kanë hapur një hetim për “vrasje të një të mituri nën 15 vjeç”. Sipas burimeve, e reja ndodhej në Paris me një grup të rinjsh turistë.
