WASHINGTON, SHBA — Presidenti i SHBA-së, Donald Trump, ka paralajmëruar se qeveria federale mund të mbyllet nëse Partia Republikane dhe Partia Demokrate në Kongres nuk arrijnë një marrëveshje për financimin e saj deri më 1 tetor. Gjatë një konference për shtyp në Shtëpinë e Bardhë, Trump deklaroi se po vazhdonin bisedimet, por se një “mbyllje për një periudhë kohore” ishte një mundësi reale.
Trump theksoi se edhe në rast mbylljeje, shërbimet thelbësore si ushtria dhe Sigurimet Shoqërore do të vazhdojnë të funksionojnë. Ai fajësoi demokratët për bllokadën, duke thënë se “shumë nga gjërat për të cilat luftojnë demokratët… nuk do të jenë në gjendje të paguhen.”
Kreu i Shtëpisë së Bardhë shpjegoi bllokadën në Senat, ku republikanët kanë 53 vende, por u duhen 60 vota për të miratuar projektligjin e financimit. “Kjo do të thotë se na duhen votat e demokratëve në favor të projektligjit të hartuar nga republikanët. Dhe nuk e di nëse mund të bëni një marrëveshje me këta njerëz,” tha Trump, duke theksuar se demokratët duhet të veprojnë për të mirën e zgjedhësve të tyre.
Më herët, Senati hodhi poshtë dy projektligje për financimin e qeverisë, një i propozuar nga republikanët dhe tjetri nga demokratët. Ky dështim rrit ndjeshëm mundësinë e një mbylljeje të qeverisë, pasi Kongresi do të jetë në pushim javën e ardhshme, duke e bërë të pamundur marrëveshjen në kohë.
