Një grua 25-vjeçare është arrestuar sot nga Policia italiane, si e dyshuar se ka vrarë duke i mbytur foshnjat e saj të sapolindura.
Ajo akuzohet gjithashtu për fshehjen e trupave të dy foshnjave, si dhe për zhdukjen e trupit të një fëmije tjetër, djalë ose vajzë, të lindur para tre vjetësh.
Gjykatësi për hetime paraprake ka lëshuar urdhër për arrest shtëpiak me përdorim të një byzyliku elektronik, në kërkesë të Prokurorisë.
Sipas mediave italiane, hetimet nisën në korrik të vitit të kaluar, kur prindërit e gruas gjetën në një dollap të shtëpisë së tyre në Pellaro trupat e dy foshnjave të mbështjellë me një batanije.
Nga shikimi i kamerave të sigurisë në zonën e banesës, rezultoi se vajza ishte vetëm në shtëpi midis orës 19:00 dhe 20:30 më 8 korrik 2024, periudha e dyshuar e lindjes dhe vdekjes së foshnjave.
Analizat biologjike në Policlinikun e Mesinës, ku vajza ishte nënshtruar një ndërhyrjeje për pastrim të mitrës, konfirmuan se dy foshnjat ishin fëmijë të saj, lindur të gjallë, dhe se shkaku i vdekjes ishte mbytja.
Familjarët, të pyetur nga hetuesit, deklaruan se nuk ishin në dijeni të ngjarjeve që kishin ndodhur në shtëpinë e tyre. Ata treguan se vajza ishte shtruar pak kohë para gjetjes së foshnjave në Spitalin Gom të Reggio Calabrias, për shkak të një hemorragjie të rëndë. Gjatë atij qëndrimi, ajo kishte raportuar vetëm shqetësime të përgjithshme fizike dhe kishte mohuar kategorikisht se kishte qenë shtatzënë.
Hetimet u plotësuan edhe nga analizimi i mesazheve midis gruas dhe të dashurit të saj, i cili po ashtu është hetuar për ndihmë personale në këtë çështje.
Nga hetimet rezultoi se çifti kishte kaluar situatën e njëjtë edhe në vitin 2022, me mosmarrëveshje të forta lidhur me vendimin për të mbajtur apo jo foshnjën.
Në gusht të atij viti, gruaja dyshohet se kishte lindur dhe më pas kishte fshehur trupin e foshnjës së sapolindur.
Gjatë operacionit, Policia e Reggio Calabrias, me ndihmën e qenve molekularë dhe një georadari, kreu kontrolle në banesat e të arrestuarës dhe të të dashurit të saj, si dhe në oborret, kopshtet dhe tokat që i përkisnin atyre ose familjarëve të tyre, në kërkim të trupave të mundshëm të tjerë që lidhen me foshnjën e lindur në 2022.
