Ka ndërruar jetë në moshën 74-vjeçare Paqësor Hajdini, babai i personazhit të njohur të rrjeteve sociale, Genard Hajdini.
Lajmi i hidhur ka tronditur familjarët, miqtë dhe ndjekësit e shumtë të familjes Hajdini, e njohur për historitë dhe videot që kanë përcjellë shpesh emocione tek publiku.
Vdekja e Paqësorit vjen vetëm dy muaj pas ngjarjes së rëndë të ndodhur në orët e para të 3 gushtit, në një lokal në rrugën “Bardhyl” të Tiranës, ku ndaj tij dhe djalit të tij, Genardit, u ushtrua dhunë fizike nga një 40-vjeçar, ngjarje që la pasoja të rënda emocionale në familje.
Paqësor Hajdini, i njohur për karakterin e tij të qetë dhe përkushtimin ndaj familjes, ndërroi jetë duke lënë pas dhimbje të thellë tek të afërmit dhe bashkëshortja e tij, Sonida, e cila sipas burimeve të afërta është aktualisht e shtruar në repartin e psikiatrisë, për shkak të gjendjes së rënduar dhe problemeve të akumuluara gjatë muajve të fundit.
Ndërkohë, mësohet se edhe Genard Hajdini ndodhet i shtruar në Qendrën Spitalore Universitare “Nënë Tereza”, në Tiranë, duke u përballur me komplikacione të rënda nga diabeti, që i kanë vënë në rrezik edhe njërën këmbë. Burime të afërta tregojnë se gjendja e tij emocionale dhe psikologjike është shumë e rënduar, pasi humbja e babait dhe problemet shëndetësore e kanë goditur rëndë.
Pak muaj më parë, Paqësor Hajdini kishte shitur disa prej tokave të tij në zonën nga vinte, për të blerë një shtëpi të re për djalin dhe vajzen, një gjest që miqtë e tij e përshkruajnë si “amanetin e fundit të një babai që jetonte për fëmijët”. Ai kishte shprehur shpesh se donte t’i siguronte djalit dhe vajzes së tij një të ardhme të qetë, duke i lënë pas vetes pasurinë e tij modeste si kujtim dashurie e përkushtimi prindëror.
Komuniteti online ka reaguar me dhimbje të thellë, duke i shprehur ngushëllime familjes dhe duke kujtuar Paqësorin si një njeri të qetë, fisnik dhe gjithmonë pranë familjes së tij, edhe në momentet më të vështira.
Në rrjetet sociale janë shpërndarë dhjetëra mesazhe ngushëllimi, ku ndjekësit i kujtojnë fjalët e tij të buta dhe lidhjen e fortë me të birin, një raport që, siç shkruajnë shumë prej tyre, “mbetet i pavdekshëm edhe përtej jetës.”
