Qytetarët e Vlorës, Beratit, Matit, Tepelenës dhe Cërrikut do të thirren për të zgjedhur kryetarët e Bashkisë më 9 nëntor. Tashmë janë zyrtarizuar emrat e kandidatëve nga Partia Socialiste, ndërsa Partia Demorkatike do mbështesin kandidatët e pavarur në këto 5 bashki. Por këto zgjedhje dhe kandidatët e përzgjedhur duket se kanë ngjallur pakënaqësi dhe rebelimi brenda PS e PD. Kështu kryetarja e Forumit të grave socialiste në Mat, Suzana Pasha Hoti, ka shpallur kandidaturën si e pavarur për bashkinë e Matit, në zgjedhjet e pjesshme lokale që do të zhvillohen në 6 bashki të vendit.
Kjo është një surprizë e këtyre zgjedhjeve, duke parë angazhimin e saj partiak për PS në bashkinë e Matit. Vetë kryetarja e gruas e PS pranon se ka mbështetur reformat e ndërmarra nga Kryeministri Edi Rama dhe qeveria socialiste, sepse ato kanë pasur në qendër gruan, qytetarin, zhvillimin, njeriun punëtor dhe profesionistin e ndershëm.
Në një postim në “Facebook”, Hoti shkruan se si një bijë e Matit, ajo dëshiron që të përfaqësojë matjanët në këtë sfidë, duke premtuar se do të kontribuojë në ndërtimin e një shteti social, në forcimin e institucioneve dhe në zhvillimin ekonomik progresiv për tërë shtesat e komunitetit. Ndërkohë në Mat, PS do të kandidojë Altin Bojnin, kandidaturë që u propozua nga strukturat vendore të PS. Altin Bojni është me profesion financier dhe aktualisht mban postin e drejtorit të Shëndetit Publik. Më herët ka mbajtur postin e drejtorit të Postës dhe drejtorit të burgut të Burrelit. “Unë jam Suzana Pasha Hoti. Një bijë e Matit me rrënjë me zemër dhe me përgjegjësi qytetare.
Kam lindur, jetuar dhe kontribuar në këtë vend, dhe gjatë gjithë jetës time nuk jam shkëputur kurrë prej Matit dhe Matjanëve tanë të dashur. Sepse kur je e lidhur me shpirt dhe me zemër me tokën ku je lindur, me Matin dhe Matjanët që ka bërë histori , nuk e braktis dot, por i qëndron pranë në ditë të mira dhe të vështira. Prej më shumë se 25 vitesh jam në shërbim publik me dashuri dhe profesionalizëm në shërbim të komunitetit Matjanë. Kam qenë pranë njerëzve në punë konkrete, në përfaqësim dhe në përpjekje për të zgjidhur hallet e tyre. Për 17 vite kam drejtuar organizatën e grave socialiste të Matit – një rol që më ka dhënë mundësinë të dëgjoj, të kuptoj, të reagoj ndaj nevojave të vërteta të komunitetit. E di mirë sa e vështirë është të punosh fort dhe të mos dëgjohesh. Prandaj sot nuk kërkoj vetëm një votë. Kërkoj besim”, shkroi Hoti në rrjetet sociale këtë fundjavë.
Reagon PD e Cërrikut
Nga ana tjetër sa i takon zgjedhjeve të pjesshme, dega e PD në Cërrik nuk pyet për Berishën, teksa deklaron se kandidatura e saj është doktor Amarildo Hoxha. Lajmin e ka bërë të ditur dega e Partisë Demokratike në Cërrik, ndërsa thekson se z. Amarildo Hoxha është njeriu i duhur, i cili do të rikthejë besimin dhe shpresën tek qytetarët e Cërrikut. “Përshëndetje të nderuar demokratët! Të dashur qytetarë të Cërrikut e rrethinave. Kandidati që do të përfaqësojë PD e Cërrikut në garën për Kryetarë Bashkie në zgjedhjet e pjesshme më 9 Nëntor është z.Amarildo Hoxha , një bir i ndershëm i këtij qyteti, një zë i qytetarëve dhe një përfaqësues dinjitoz i Partisë Demokratike.
Një garë që nuk është vetëm për një post, por për dinjitetin e qytetit tonë, për besimin e qytetarëve tanë dhe për rikthimin e shpresës që Cërriku meriton. Cërriku ka nevojë për ndryshim, për frymë të re, për dinjitet të ndershëm e vizionar. Është koha që Partia Demokratike të Rikthehet si forcë e shpresës dhe e besimit në çdo familje të këtij qyteti! Kandidati ynë Dr. Amarildo është njeriu i duhur për këtë mision. Ai vjen nga njerëzit, i njeh hallet e tyre, i ka dëgjuar dhe i ka ndihmuar jo vetëm në kohë fushatash, por çdo ditë. Ka integritet, përkushtim dhe një dashuri të vërtetë për këtë komunitet .
Ai përfaqëson tipin e përfaqësuesit që ne duam të shohim: të afërt me qytetarin, të drejtë në vendimmarrje dhe të palodhur në punën. Partia jonë në Cërrik ,ka njerëz të aftë , struktura të forta dhe mbi të gjitha zemrën e qytetarëve. Nëse qëndrojmë të bashkuar, nëse punojmë me përkushtim dhe me besim , më 9 Nëntor ne do kthejmë Cërrikun në ngjyrat e shpresës , në ngjyrat e së djathtës , në ngjyrat e fitores Prandaj dhe Cërriku do të votojë ndryshimin më 9 Lëndor. Suksese dhe Fitore Dr.Amarildo”, shkroi këtë fundjavë në rrjetet sociale dega e PD Cërrik. Ndërkohë sikundër e theksuam më sipër, qytetarët e Vlorës, Beratit, Matit, Tepelenës dhe Cërrikut do të thirren për të zgjedhur kryetaret e bashkisë më 9 nëntor. Tashmë janë zyrtarizuar emrat e kandidatëve nga Partia Socialiste, ndërsa demokratët do mbështesin kandidatët e pavarur në këto 5 bashki.
Vlorë
Surpriza e këtyre zgjedhjeve është Brunilda Mersini, hera e parë që një grua synon drejtimin e bashkisë. Mersini, ish-drejtoreshë e spitalit rajonal të Vlorës u zgjodh deputete në këtë legjislaturë dhe duhet ta dorëzojë mandatin pa e shijuar as 2 muaj. Kryeministri Edi Rama ka theksuar se “qëndrimet i ka si burrë”, duke i dhënë peshë kandidaturës së saj. Përballë Mersinit në Vlore do të jetë Dionis Sota, aktivist i shoqatës “Arta”, kandidat i pavarur i mbështetur nga PD dhe Adriatik Lapaj, pa përvojë politike.
Cërrik
Në Cërrik, gara do të jetë mes tre kandidatëve. PS ka propozuar Florenc Dokën, jurist dhe ish-drejtor i burgut të Peqinit, ndërsa PD mbështet Amarildo Hoxhën, mjek i ekipit të futbollit të Elbasanit, kandidat i pavarur. Këtu, lëvizja “Shqipëria Bëhet” synon të hyjë në garë kandidat të sajin, Eligert Himën, kriminolog i sapokthyer nga Italia.
Tepelenë
Për Bashkinë e Tepelenës, PS ka zgjedhur Gramoz Sako, ish-Komandant i Gardës së Shqipërisë për 11 vjet, e që së fundmi merrej me biznes. PD mbështet Gabriel Gumën, një arkitekt 26-vjeçar i kthyer në vendlindje, i cili synon të sjellë frymë të re në qeverisjen lokale.
Mat
Në Mat, PS do të kandidojë Altin Bojnin, financiar, cili ka mbajtur një sërë postesh drejtuese në nivel lokal, ndërsa PD mbështet Eduart Brahlikën, avokat me reputacion të mirë në zonë, kandidat i pavarur.
Berat
Kryetari i komanduar i Bashkisë së Beratit, Ervin Ceca, ekonomist me profesion, kërkon të zgjidhet kryetar nën siglën e PS. Përballë tij do të jetë në kampin opozitar do të jetë biznesmeni Pavlo Shkarpa, që po kërkon ndryshim në drejtimin lokal.