Fenomeni i mbështetjes financiare për persona të akuzuar për vrasje ka ndezur diskutime të gjera si në SHBA, ashtu edhe në Shqipëri.
Së fundmi, mediat amerikane raportojnë se Luigi Mangione, 27-vjeçari i akuzuar për vrasjen e CEO-së së UnitedHealthcare, Brian Thompson, ka marrë mbi 40 mijë dollarë nga admirues dhe mbështetës që i kanë dërguar para në llogarinë e tij të burgut.
Mangione, një ish-programues i arrestuar pas një arratisjeje pesëditore, akuzohet për vrasje, armëmbajtje pa leje dhe përndjekje. Ai ka mohuar akuzat, ndërsa mbështetësit e tij e kanë përshkruar si “simbol të revoltës ndaj sistemit shëndetësor amerikan”. Sipas raportimeve, përveç donacioneve monetare, ai ka marrë edhe mijëra letra e dhurata nga ndjekës që e konsiderojnë “hero anti-korporatash”.
Një situatë e ngjashme ka ndodhur së fundmi edhe në Shqipëri, pas ngjarjes së rëndë në Gjykatën e Apelit, ku 30-vjeçari Elvis Shkambi vrau me armë zjarri gjyqtarin Astrit Kalaja gjatë një seance gjyqësore më 6 tetor. Menjëherë pas ngjarjes, në rrjetet sociale u hap një faqe GoFundMe për mbledhje fondesh në ndihmë të tij dhe djalit të tij, Gjon Shkambi. Fushata, e krijuar me qëllim sigurimin e një mbrojtjeje ligjore “profesionale dhe të pavarur”, arriti të mbledhë mbi 8 mijë dollarë brenda pak ditësh.
Edhe pse të ndara nga mijëra kilometra, të dyja rastet kanë një pikë të përbashkët: valën e reagimeve dhe përçarjes që kanë shkaktuar në opinionin publik, mes atyre që i dënojnë aktet dhe atyre që i justifikojnë si “revoltë kundër sistemit”.
Ekspertë të medias dhe sociologë e kanë cilësuar këtë dukuri si “radikalizim dixhital”, ku individë të akuzuar për akte të rënda dhune kthehen në figura që fitojnë simpati online dhe përkrahen financiarisht nga pjesë të caktuara të publikut.