Një furtunë politike duket se ka shpërthyer në selinë blu. Sali Berisha, për herë të parë, pranon se mandati i tij në krye të Partisë Demokratike ka një afat që po i afrohet fundit, duke paralajmëruar se do të rikandidojë përballë valës së rebelimit të brendshëm. Shkëndijën e parë e ndezi deputeti Besart Xhaferri, i cili dy ditë më parë deklaroi publikisht se mandati i Berishës mbaron në prill 2026 dhe se kryedemokrati duhet të largohet nëse nuk zhvillon zgjedhje të reja. Deklarata e tij tronditi themelet e PD-së dhe u lexua si sinjal për një kryengritje të heshtur kundër liderit historik. Në përpjekje për të shuar zjarrin, Berisha doli dje në mbrojtje të vetes, por pranoi se interpretimi i statutit është i hapur dhe se “anëtarësia do të vendosë”. Por ndërkohë dje, jashtë selisë blu, Evi Kokalari goditi fort me një reagim që i ngjan një tërmeti politik. Ajo shënjestron Xhaferrin, Këlliçin dhe lidhjet e tyre me Ilir Metën, duke zbuluar, sipas saj, pazare dhe prapaskena që po gatuhen për të marrë në dorë PD-në. “Moçali po përpin krijuesin e vet”, thekson Kokalari, duke e quajtur Berishën viktimë të sistemit të kalbur që vetë ndërtoi. Sipas saj, njerëzit që dikur ushqeu me pushtet dhe ambicie, sot po e rrethojnë si grabitqarë për të rrëmbyer fronin. Por e gjithë kjo panoramë ka bërë që në kampin demokrat, nervozizmi të rritet, ndërsa zërat për riorganizim dhe ndryshim po marrin formë gjithnjë e më të qartë. 2026 po shihet si viti i përplasjes finale mes Berishës dhe “pjellave të moçalit” të tij politik. Dhe nëse sinjalet e tanishme konfirmohen, rrëzimi i Berishës mund të jetë po aq spektakolar sa ngritja e tij. Megjithatë mbetet të shihet se çfarë do të ndodhë, ndërsa në vijim, po pasqyrojmë deklaratat që ndezën debatin politik, nga Besart Xhaferri, Sali Berisha dhe Evi Kokalari, të cilat kanë tronditur themelet e Partisë Demokratike.
Reagimi i Berishës
Konkretisht kryetari i Partisë Demokratike, Sali Berisha, ka reaguar dje pas deklaratës së deputetit Besart Xhaferri, i cili një ditë më parë tha se kryedemokrati duhet të largohet nga drejtimi i PD-së në vitin 2026 nëse nuk arrin të faktojë atë që e quan “farsë elektorale të 11 majit”. Në një deklaratë për mediat, Berisha tha se çdo anëtar ka të drejtën të shprehë mendimin e tij të lirë, por nënvizoi se interpretimi i statutit duhet të bëhet në mënyrë korrekte. “Ju garantoj se çdo deputet, anëtar mbështetës i kësaj partie do të jetë i lirë të shprehë çdo mendim që do. Natyrisht interpretimi i nenit të statutit duhet të jetë i saktë. Statuti bën fjalë për zgjedhje dhe jo farsa dhe që ta mbyllim këtë punë do të jetë anëtarësia e PD jo që do të bëjë interpretimin përfundimtar”, deklaroi dje Berisha para gazetarëve gjatë një konference nga selia blu.
Reagimi i Kokalarit
Ndërkohë sa i takon deklaratës së Xhaferrit dje ka reaguar në rrjetet sociale edhe aktivistja e njohur shqiptaro-amerikane, Evi Kokalari. Kjo e fundit shënjestron Besart Xhaferrin dhe lidhjet e tij me Belind Këlliçin e Ilir Metën, duke e quajtur produkt të një sistemi të kalbur që vetë Berisha ndërtoi. Kokalari kujton prapaskenat, manipulimet dhe marrëveshjet që, sipas saj, e kanë kthyer PD-në në një moçal interesash personale. Ajo thekson se tani janë pikërisht “fijet” që ushqeu Berisha ato që po e rrëzojnë. “Besart Xhaferri nxori kokën dhe thotë Berishës i mbaron mandati në Prill? Në fakt Berishës ka kohë që i ka mbaruar mandati, po gjithsesi, ky çfarë do? Kush është Besart Xhaferri dhe si u bë kryetar i FRPD-se, deputet dhe pretendues për kreun e PD-së? Besart Xhaferri, është një mik i ngushtë i Belind Këlliçit. Herën e parë (dhe të fundit) që e takova ishte në Mars të 2022, gati një muaj përpara Kuvendit të 2022 ku do zgjidhej Këshilli Kombëtar. Darka ishte shtruar për miqtë e mi që erdhën në Shqipëri nga Federata e Republikanëve të rinj. Xhaferri ulet pranë meje dhe Këlliçi përballe. Hera e parë që e takoja, dhe pa pikë turpi më thotë: “A nuk është i mirë për kryetar partie?” – dhe sinjalizon nga Këlliçi. Këlliçi, që jo më kot fryhej si gjel, i dukej qartë ngazëllimi në fytyrë, por dhe një lloj krenarie që do të ishte kryetari i ardhshëm. Fyerja si gjel e egos së Këlliçit ishte ves që dhe Ilir Meta e kishte komentuar si problem, dhe diku në atë kohë kam kuptuar, që ishte Meta që shtynte Këlliçin dhe i thoshte se do bëhej kryetari i ri PD-së. Këlliçi bënte sparkatën për Metën dhe gjithë faktet që ka nxjerrë për inceneratorin, nga materialet që kishte Meta ishin. Metës i ishte prishur pazari nëpërmjet Arben Ahmetajn (me sa kam kuptuar), dhe luftonte anën tjetër nëpërmjet Këlliçit. Ndërkohë Këlliçi i dilte dhe i shitej popullit si hero që luftonte korrupsionin (lol) ndërkohë, qëllim kishte kryesinë e PD-së. Dhe Meta atë qëllim kishte, marrjen e PD-së nëpërmjet Këlliçit. (për arsye legale po shtoj se meqenëse jeni aq budallenj sa s’keni këllqe të përgjigjeni publikisht dhe duke qenë politikanë, po hidhni në gjyq, ju lutem jepni fakte tuaja në kundërshtim të çfarë kam shkruar më lart). Por ti kthehemi Xhaferrit. Kush është dhe pse është në atë parti dhe Parlament. Xhaferri nuk ka asnjë meritokraci në atë parti, por ajo që kishte ishte një kompani që mesa kuptova plotësonte formularët për të çuar rinjtë jashtë shtetit. Nuk di me saktësi por aplikacioni kushtonte diçka tek 2000 euro. Prandaj, vënia e këtij si kryetar FRPD ishte në konflikt të drejtpërdrejtë, sepse ne na duhej rinia ne vend, jo ta inkurajonim të ikte jashtë. Xhaferri nuk mori as 150 vota në Këshillin Kombëtar, pra nuk kualifikonte, por e futi Belind Këlliçi me manipulimet e tij, për të cilën kam bërë luftë dhe e kam ekspozuar dhe i kam kërkuar të na thotë çfarë ndodhi me ato vota. Sigurisht Këlliçi u kap mat dhe refuzoi të përgjigjet, por më hodhi në gjyq për shpifje (hapu dhe) – sipas tij shpifa se ekspozova votat e manipuluara ndërkohë që kisha të gjithë listat në dorë. Me këtë pretekst tha unë nuk flas sepse jemi në gjyq. E pra, tashti ngjarjet flasin vetë. Besart Xhaferri u bë pjesë e Këshillit Kombëtar kur nuk e njihte asnjë njëri dhe s’mori votat e mjaftueshme për të qenë anëtar i saj. Fast Forward – GUSHT 2022 – Flamur (pesa) Noka deklaron hapjen e garës së FRPD-së. Di biseda private që kur Xhaferri ndihmonte Nokën dhe foltoren me para (për arsye legale them verifikoheni), Noka i thotë Xhaferrit “Po ty të të bëjmë kryetar të FRPD-së”. Dhe kështu nisi lufta, beteja dhe tallja me të rinjtë e FRPD-së që hynë në garë. Noka merrte në telefon degët e PD-së së rretheve dhe ju dërgoi listën se kush do fitonte, dhe jo vetëm, por dhe renditjen e fituesve…
1- Besart Xhaferri (fitues)
2- Kaçorri (s’më kujtohet emri)
3- Merenglen D
4- Barbara D
Besart Xhaferri u bë kryetar i FRPD me dhunë (verbale) e dirigjuar nga Flamur (pesa) Noka dhe gjithë leshkot e tij. Sërish bëra luftë ti ekspozoja sepse realisht m’u dhimbsën kandidatët e tjerë që kishin shumë më shumë kontribute në atë parti dhe po i vidhte vetë partia sy më sy. Sot, Besart Xhaferri, për të cilin personalisht s’kam asnjë simpati sepse meshkuj të këtij niveli, pa asnjë dinjitet, që hynë e dalin në parlament dhe në PD sikur i ka votuar njëri, dhe s’ju dridhet as qerpiku, më japin një alergji që të sëmur – sot ai kërkon heqjen e Berishës. Kjo mbetje e sistemit të kalbur që ka adoptuar PD-ja, që hyri gjithkund ku nuk i takon, sot jep intervista se Berishës i mbaron mandati dhe duhet të ikë. Madje ka pafytyrësinë të thotë që Berisha të jap prova që zgjedhjet u vodhën, dhe të jap dorëheqjen. Po, po ky që ishte epiqendra e fiaskos së garës së FRPD-së (nuk besoj ta keni harruar), dhe arsyeja pse personalisht iu ktheva publikisht Berishës. Ju kujtohet ‘Turp te kesh Sali Berisha?’ -ishte koment pikërisht se takoi Xhaferrin në zyrë dhe i vuri vulën garës ndërkohë që kandidatët e tjerë kishin fakte të vjedhjes së votës së tyre në favor të Xhaferrit. Tashti, Sali Berishës, fenë ja luajnë këta kërmat e moçalit se vetë i mblodhi, dhe s’ka kënaqësi më të madhe kur i kthehen në këtë formë. Për më tepër, këta fituan (siç e kam shpjeguar më lart) pikërisht nga sistemi i kalbur që ka vënë në funksion Berisha, prandaj është absurditet dhe komedi kur sheh hajdutin e vogël qe i kthehet hajdutit të madh dhe e denoncon si fajtor. Personalisht, ndjehem si shqiponjë që e vëzhgoi këtë moçal nga lart, pa u ulur dhe pa u bërë pis, por duke i parë të gjithë qartë fare dhe jam gati për aktin përfundimtarë të kësaj lufte mes Berishës dhe atyre që realisht që nga fillimi i foltores, kishin vetëm një qëllim – marrjen e PD-së, jo se ju dhimbset Shqipëria dhe duan të bëjnë ndryshime, por thjeshtë se u rritën duke pritur radhën që të ndërtojnë dhe ata Kullën e Malit apo thjeshtë kullat e radhës”, shkroi dje Kokalari.
Çfarë tha Xhaferri?
Nga ana tjetër kujtojmë se deputeti i Partisë Demokratike, Besart Xhaferri, ka bërë dy ditë më parë një deklaratë të “bombë” që po trondit radhët e opozitës. Në një intervistë për mediat, deputeti Xhaferri zbuloi se mandati i kryetarit Sali Berisha përfundon në prill të vitit 2026. Sipas Xhaferrit, në të njëjtën periudhë duhet të zhvillohen zgjedhje të reja brenda PD-së, siç e përcakton statuti i partisë. Deputeti demokrat theksoi se nëse Berisha nuk e mban premtimin për të përsëritur zgjedhjet e 11 majit, të cilat opozita i konsideron të manipuluara nga PS, ai duhet të largohet nga drejtimi. “Mandati i zotit Berisha mbaron në prill të 2026. Edhe në prill të 2026 duhet të ketë zgjedhje brenda në PD. Nëse Berisha nuk i ka ripërsëritur zgjedhjet, duhet të largohet”, deklaroi dje Xhaferri. Ai shtoi se do të vijojë të qëndrojë në PD, por nuk do të përfshihet në përplasje të brendshme. “Nëse nuk ikën Berisha, unë do të vazhdoj misionin brenda PD, por nuk do të bëj luftë brenda partisë. Kjo, pasi përballja brenda partisë ka një lloj hierarki, nuk është radha ime”, nënvizoi ai. Por deklarata deputetit të Partisë Demokratike, Besart Xhaferri është parë si sinjal për ndryshime të mundshme në lidershipin e demokratëve. Brenda PD-së, kjo ka ndezur debat për riorganizimin dhe rikthimin e legjitimitetit. Madje burime brenda partisë thonë se 2026 mund të jetë viti i një epoke të re për demokratët.