Në Shqipëri, transferimet nuk ndodhin vetëm në futboll. Ndodhin edhe në politikë, me një ritëm aq të shpejtë, sa çdo trajner do ta kishte zili.
Ish-kapitenia e PD-së në Sarandë, Manjola Nikollo, sapo ka firmosur kontratën e re me Partinë Socialiste. Nga “blu” në “ mavi”, nga “opozita” në “pushtet”. Me pak fjalë, nga stoli te pankina kryesore.
Në vend të agjentëve sportivë, këtu kemi agjentë të pushtetit. Nuk ka rëndësi kush fiton zgjedhjet, rëndësi ka kush fiton vendin e punës. Dhe në këtë kampionat politik, duket se PS është si Real Madrid: blen këdo që di të driblojë me fjalë, pa pyetur për ngjyrën e fanellës që kishte dje.
Pas Nikollos, në listën e “blerjeve” u fut edhe ish-deputetja Gjeni Gjergji, që mori drejtimin e spitalit të Elbasanit, “në emër të sakrificës për profesionin”. Po, sakrificë e madhe, nga karrigia e opozitës në kolltukun e drejtueses.
Nga ana tjetër, PD duket si një skuadër që luan me mbrojtësit kundër vetes. Trajneri Berisha kërcënon se kush largohet, përjashtohet. Por me këtë ritëm, duket se do t’i duhet të përjashtojë edhe hijen e vet.
Në fund të fundit, ky nuk është më pluralizëm, por një treg i lirë ku ideologjitë shiten me metër, dhe parimet mbyllen në kuti, me fjalinë klasike: “Nuk është çështje partie, është çështje shërbimi”.
Shërbimi ndaj kujt? Varet kush paguan më shumë…
Ndërsa politikanët gëzojnë karrigen e tyre të re, populli fiton vetëm një gjë: të drejtën e pakundërshtueshme për të votuar përsëri për problemet që nuk u zgjidhën as nga skuadra e vjetër dhe as nga skuadra e re, edhe pse e përditësuar me ‘blerje strategjike’. JOQ
