Një aktivitet solemn u zhvillua këtë të premte në Shkodër, ku dhjetëra familje legaliste dhe mbështetës të Mbretit Zog u nderuan për kontributin dhe besnikërinë e tyre ndër vite ndaj familjes mbretërore shqiptare.
Në këtë takim mori pjesë Princ Leka Zogu II, i cili u prit me ngrohtësi nga qytetarë, përfaqësues të shoqatave legaliste dhe figura publike të njohura të Shkodrës.
Në fjalën e tij përshëndetëse, Princ Leka shprehu mirënjohje të thellë për qytetin e Shkodrës, duke theksuar rolin e tij historik në ruajtjen e vlerave kombëtare dhe mbështetjen që ka dhënë për monarkinë shqiptare.
“Shkodra ka qenë gjithmonë vatër e besimit dhe qëndresës. Mirënjohje për gjithë zogistët që qëndruan pranë familjes time ndër vite. Dashuria jonë për Shkodrën është e veçantë dhe e përjetshme,” – u shpreh Princ Leka Zogu II.
Zëri i legalistëve:
Në aktivitet morën fjalën edhe përfaqësues të Legalitetit dhe Partisë së të Drejtave të Legalistëve.
Tedi Kopliku, ish-kandidat i PD për Shkodrën dhe përfaqësues i kësaj lëvizjeje, kujtoi periudhën e Mbretit Zog si një kohë stabiliteti dhe ndërtimi institucional.
“Në kohën e Mbretit Zog treguam se ndërtojmë shtetin. Ajo ishte periudha e rendit dhe e dinjitetit kombëtar,” – tha Kopliku.
Ndërsa kryetari i legalistëve, Sokol Axhami, theksoi se ka ardhur momenti për një rishikim të sistemit politik, duke propozuar rikthimin e monarkisë parlamentare si model stabiliteti.
“Kemi detyrim të rikthejmë sistemin mbretëror. Sistemi mbretëror garanton stabilitet, unitet dhe zhvillim për Shqipërinë. Është koha që të ringjallet fryma e legalitetit në shërbim të kombit,” – deklaroi Axhami.
Në fund të aktivitetit, Princ Leka II ndau certifikata mirënjohjeje për disa familje shkodrane që kanë qëndruar me besnikëri pranë familjes Zogu ndër vite, duke kontribuar në ruajtjen e trashëgimisë dhe vlerave kombëtare.
Ceremonia u shoqërua me duartrokitje të gjata dhe emocione, ndërsa të pranishmit e cilësuan takimin si një moment simbolik që lidh historinë e monarkisë shqiptare me Shkodrën, qytetin që ka mbetur gjithmonë besnik ndaj idealit të Zogut.
Takimi përfundoi me foto, përqafime dhe premtime për bashkëpunim më të ngushtë mes strukturave legaliste dhe fondacionit “Mbretëresha Geraldinë”, nën kujdesin e Princ Lekës II.