Kreu i SPAK Altin Dumani u është përgjigjur pyetjeve të deputetëve në raportimin e tij në Parlament para ligjvënësve.
Dumani iu përgjigj një pyetjeje nga deputeti i PD Belind këlliçi, lidhur me përfshirjen e zv/kryeministres Belinda Balluku në çështjen e aeroportit të Vlorës.
Kreu i SPAK pranoi se çështja ndodhet në fazën e hetimit paraprak dhe për këtë arsye nuk mund të japë shpjegime.
“Unë nuk mund të jap, ju përmendët aeroportin e Vlorës, nuk mund të jap shpjegime për çështje që janë në fazën e hetimit paraprak”, u shpreh Dumani.
“Është çështje në hetim. Nuk jap asnjë koment. Prokurori Prenci dhe të gjithë prokurorët kanë përkrahjen time. Jam në komunikim të përhershëm me prokurorin, deri në këtë cast nuk më ka paraqitur asnjë kërcënim. Prençi ka pasur dhe ka të gjithë solidaritetin tim në çdo çështje që ka në ndjekje. Jo vetëm Prençi, por të gjithë prokurorët e SPAK. Si drejtues i Prokurorisë së Posaçme asnjëherë nuk kam qenë bllokues hetimesh. Përkundrazi jam përpjekur që prokurorët të kenë një ambjent të lirë për të ushtruar ndjekjen penale. I kam mbështetur dhe do t’i mbështes” u shpreh Dumani në kuvend.
Belinda Balluku mori një fletë-thirrje për t’u paraqitur në Prokurorinë e Posaçme në lidhje me hetimin e shkeljes së barazisë në tendera, pas disa bisedave që janë zbuluar në telefonin e ish-vartësit të saj Ervis Berberi. Gjithsesi, zv.kryeministrja u shfaq në Rumani këtë të hënë për një takim me ministrat e energjisë të disa vendeve të BE.
Në kushtet kur zv/kryeministrja e vendit Belinda Balluku, nuk ka pranuar të shkojë sot në ambjentet e SPAK, për tu njohur me akuzën zyrtare,mësohet se prokuroria i ka ripërsëritur fletë-thirjen.
Kreu i SPAK, Altin Dumani, gjatë raportimit të veprimtarisë vjetore të institucionit që drejton në Kuvendin e Shqipërisë, u pyet në lidhje me hetimet për inceneratorët, për Erion Veliajn dhe Arben Ahmetajn.
Altin Dumani tha për Veliajn se hetimet paraprake nuk kanë përfunduar dhe vazhdojnë ende ndërsa për Arben Ahmetajn, Dumani tha se është në kërkim ndërkombëtar dhe deklaratat e tij vlerësohen rast pas rasti.
Kreu i SPAK theksoi se Ahmetaj është në kërkim për korrupsion dhe pastrim parash, ndërsa theksoi se ka edhe vepra të tjera penale që lidhen me inceneratorët.
“Pse nuk është marrë ende i pandehur Erion Veliaj për inceneratorët, dua të them se hetimet paraprake nuk kanë përfunduar por vazhdojnë akoma.
Nëse ka një përpjekje të SPAK për të kërkuar një dëshmi të ish-zv.kryeministrit Arben Ahmetaj nga Zvicra, deklarimet publike vlerësohen rast pas rasti.
Për ne është një person në kërkim ndërkombëtar për korrupsion pasiv, pastrim i produkteve të veprës penale dhe vepra të tjera të lidhura me inceneratorët.”-tha Dumani.