8 herë ka qëlluar Bertil Alliaj ndaj kushëririt të tij, Dalan Alliaj, mbrëmjen e 1 nëntorit në fshatin Gjorm të Vlorës. Sipas burimeve, në banesën e Bertilit, i cili rezulton person i dënuar me 35 vite burg, kishte shkuar kushëriri i tij, Dalani, të cilin e kishte parë përmes kamerave të sigurisë të vendosura në rrugë.
Pasi ka konstatuar makinën, Bertili ka dalë nga banesa dhe, sipas policisë, pas 5 minutash janë dëgjuar të shtënat me armë zjarri. Sipas deklarimeve, në banesë ndodheshin Bertili bashkë me familjen e tij.
Në orën 20:00, Bertili ka dalë nga banesa, ku i ka thënë familjarëve se do të takonte një shok, por sapo janë dëgjuar të shtënat, ata kanë dalë në rrugë dhe kanë konstatuar Dalanin të vrarë, dëshmon një nga familjarët e Bertil Alliaj. Ndërkohë, sapo kanë konstatuar trupin e pajetë, Bertili në ato momente i ka thënë se kishte vrarë Dalanin, dhe kur ishte duke u larguar, u ka thënë gjithashtu të njoftonin policinë dhe të thoshin se ai ishte autori i vrasjes.
Gjithashtu, Bertili është shprehur se nuk do të shihnin më, pasi do të vriste veten. Por, teksa autori i vrasjes mori arratinë, kanë qenë dy të afërm të tij, të cilët kanë transportuar Dalanin në spital, por ai nuk ka mundur të mbijetojë nga plagët e marra.
Deri më tani, shkaqet mbeten ende të paqarta, pasi vetë Bertil Alliaj nuk ka preferuar të japë dëshmi dhe të sqaroje motivet e ngjarjes së rëndë.
