Pas ditëve me reshje të dendura dhe përmbytje në disa zona të vendit, moti sot po jep një frymëmarrje të shkurtër. Shiu është tërhequr nga shumë zona dhe priten vetëm reshje të pakta në veri e verilindje, ku në lartësi do të ketë flokë dëbore. Kjo pauzë u jep mundësi zonave të përmbytura të thithin ujin, por qetësia nuk zgjat.
Nga nesër, vranësirat rikthehen me shpejtësi dhe pas mesditës fillon sërish rritja e intensitetit të reshjeve. Mbrëmja e së martës, nata dhe e mërkura do të jenë pika kulmore e këtij cikli – reshje mesatare dhe lokalisht intensive në pjesën më të madhe të vendit.
Zona më e goditur do të jetë sërish jugu dhe juglindja: Vlora, Gjirokastra, Saranda, Korça, Pogradeci, Erseka, Bilishti. Këto rajone rrezikojnë sasi të larta reshjesh, deri në 80–100 mm. Edhe Shkodra dhe Lezha do të marrin një tjetër ngarkesë reshjesh, por më të kufizuar se jugut.
Temperaturat sot zbresin deri në -2°C në zonat malore, por nga nesër rriten gradualisht, duke bërë që dëbora të tërhiqet në zona shumë të thella malore. Dëbora do rikthehet vetëm drejt së enjtes dhe të premtes kur temperaturat bien sërish në vlera zero ose negative.
Durrësi mbetet një nga qytetet më problematike, për shkak të infrastrukturës dhe ngopjes së tokës me lagështi. Edhe reshjet më të vogla aty po krijojnë situata.
Përmbytjet e ditëve të fundit erdhën nga sasi të frikshme reshjesh – në shumë zona të veriut ranë 200–350 mm ujë në vetëm pak ditë, duke tejkaluar kuotat mujore dhe afruar nivelin kritik të kaskadave. Meteorologët thonë se, nëse do të kishim patur një episod të mëparshëm dheun e ngopur, sot do të flitej për përmbytje masive.
Fundjava vjen me përmirësim të lehtë, reshje më të pakta dhe një stabilizim të motit drejt fillimit të dhjetorit. Sipas sinoptikanëve, pjesa e parë e dhjetorit nuk pritet të sjellë ngjarje ekstreme.
Për festat e 28–29 Nëntorit, moti mbetet i paqëndrueshëm. E enjtja e 28-tës sjell reshje të dobëta në të gjithë vendin, më të theksuara në Vlorë. 29-ta është më e lehtë, me intervale me diell dhe reshje të pakta. Korça mund të ketë pak dëborë në zonat përreth, sidomos Dardë e Voskopojë, por jo në sasitë e mëdha që priten në dimër.
