Kryeministri i Kosovës, Albin Kurti, ka dhënë sot një lajm të madh për futbollistët e përfaqësueses së Kosovës, duke zyrtarizuar shpërblime financiare të konsiderueshme për rrugëtimin e tyre drejt Kampionatit Botëror 2026.
Pas shortit që e vendosi Kosovën përballë Sllovakisë në gjysmëfinalen e “Play-off”-it, qeveria ka vendosur të motivojë edhe financiarisht lojtarët për të arritur këtë sukses historik.
Gjatë mbledhjes së sotme të qeverisë, Kurti njoftoi se fondi i shpërblimeve do të ndahet në dy faza, në varësi të rezultateve.
Ai u shpreh: “Së pari, në rast të fitores ndaj Sllovakisë, zotohemi për shpërblim në vlerë prej 500 mijë euro.” Por shuma bëhet edhe më e madhe nëse “Dardanët” arrijnë ëndrrën e madhe. “Dhe së dyti, në rast të kualifikimit në Kupën e Botës, zotohemi edhe për 1 milion euro të tjera shpërblim,” deklaroi Kryeministri.
Ky vendim konfirmon mbështetjen institucionale për ekipin kombëtar në prag të ndeshjeve më vendimtare që futbolli kosovar ka pasur ndonjëherë.
