Homazhet për nder të këngëtarit të ndjerë Shpat Kasapi në Tetovë janë shoqëruar me momente të forta emocionale, ku më prekësi ishte fjalimi i vokalistit të grupit legjendar “Elita 5”, Arif Ziberi.
Mes lotësh dhe me zërin që i dridhej, Ziberi zbuloi pengun e madh që i ka mbetur me Shpatin, duke treguar komunikimin e tyre të fundit vetëm pak javë më parë.
“Para 2-3 javësh kontaktova, më thirri Shpati… dhe më tha: ‘Axha Arif kam hap një lokal dhe dua të vish të pish një kafe’. Unë i premtova se do të vij, por nuk arrita. Dhe më ka mbetur një peng i madh,” u shpreh ai i dërmuar.
Artisti tregoi edhe momentin kur vajza e tij i dha lajmin e kobshëm, të cilin fillimisht refuzoi ta besonte. Por, momenti kulminant që përloti të gjithë sallën ishte premtimi i fundit që Ziberi i bëri kolegut dhe mikut të tij mbi arkivol, lidhur me një bashkëpunim muzikor që kishin planifikuar, por nuk arritën ta realizonin.
“Shpeshherë kur takoheshim bisedonim për të bërë një duet dhe për fat të keq nuk gjetëm kohë që ta realizojmë. Por unë jam i sigurt se Shpati gjendet në një botë shumë më të mirë se kjo. Dhe të premtoj Shpat: Do ta realizojmë atë duet në botën tjetër,” e mbylli ai fjalën e tij mes duartrokitjeve dhe lotëve të të pranishmëve.
