Dy vjet pas vrasjes tronditëse të Liridona Ademajt, e cila u ekzekutua para syve të fëmijëve të saj, detaje të reja nga dosja hetimore zbulojnë planifikimin gjakftohtë të krimit nga bashkëshorti i saj, Naim Murseli.
Sipas dokumentit të Forenzikës Psikiatrike, i cili citon dëshminë e Granit Plavës (ekzekutorit), konfirmohet se gjithçka ishte e paramenduar.
Plava ka rrëfyer se Naimi i kishte dhënë armën me 5 fishekë në karikator dhe 15 të tjerë rezervë gjatë një takimi te një pompë benzine, pasi kishin pirë kafe së bashku.
Dëshmia bëhet edhe më rrëqethëse kur përshkruan momentin e vrasjes. Plava tregon se e kishte ndjekur makinën e Naimit pas darkës në Graçanicë, duke pritur instruksionet.
Kur mbërritën pranë shtëpisë, në momentin kritik, Naimi kishte hapur xhamin e makinës për t’i dhënë mundësi vrasësit të vepronte.
“Kur ai u nal, i kom dalë përpara… ata e kanë qel xhamin pak edhe unë e kom qellu në drejtim të asaj grusë. Naimi thojke ‘gjuj gjuj’,” ka rrëfyer Plava.
Ai shtoi se pas krimit ishte larguar me shpejtësi, kishte shkuar në shtëpi për të fjetur dhe vetëm të nesërmen kishte mësuar se Liridona kishte ndërruar jetë.
Rrëfimi:
“Dy ditë më herët, nëpërmjet Kushtrimit, unë u pata taku me Naimin, patëm dalë natën edhe patëm pi. Ditën kritike unë u zgjova në mëngjes, edhe Naimi kah ora 9:30 – 10:00 ka ardhë më ka marrë edhe jena nis për në Prishtinë. Ai ka ec përpara me kerr, unë përmas. Jemi ndal të pompa … edhe aty ma ka lonë allatin e 5 fishekë në shanzher dhe 15 fishekë të tjera. Tani jemi nis për në Prishtinë, ndërkohë ma ka qitë ni kafe edhe mu më ka ardhë qajo energjia madhe.
E kom përcjellë ato deri te shpija e vet edhe e kena pa venin, tani une kom dalë në rrugë e kom njek përmas Naimin, se ai ka pasë mi marrë grunë edhe fmin edhe me dalë në darkë. Une gjithë jom konë përmas, po mas tina u shku teposhtë ka pas ni aksident të trafikut, une i rashë ni rrugës tjetër se u tuta që po më nxen policia e kisha pi marihuanë. Ma ka shkru Naimi edhe ma ka vet ku je, tani ma ka qu lokacionin me ka prit te shitorja, une tani e kom nxon rrugës.
Kur kemi mri te kafja në Graçanicë ai ka hi me familjen e vet, une kom nejt aty në kafe edhe i pritsha instruksionet, tani me ka shkru Naimi me ka thanë ‘po qohmi?’. Kur kanë dalë prej kafes une jom kan mas tyne, kom mri, jena mri te veni ngat shpise së Naimit, une e kom kan kerrin, edhe kur ai u nal i kom dalë përpara, ate e kan qel xhamin pak edhe kom unë e kom qellu në drejtim të asaj grusë. Naimi thojke “gjuj gjuj” po une u nisa drejt teposhtë edhe me kerr kom mri në shpi. Mas nja ni ore kom mri në shpi kom ra kom flejt, të nesërmen kom marrë vesh që ajo ka dek. Mas dy ditëve ka ardhë policia edhe më kanë arrestu”, ka thënë Plava.
Kjo dëshmi e rëndë përforcon kërkesën e familjes Ademaj për burgim të përjetshëm ndaj të akuzuarve.
