Sali Berisha vesh me përgjegjësi për disfatën e 11 majit ata që i quan tradhtarë. Në konferencën për shtyp kreu i PD foli për tradhti të brendshme në parti, duke thënë se gjatë fushatës së 11 majit pati nga ata që nuk punuan asnjë ditë, ose nga ata që punuan për PS.
Kreu i PD thotë se do të jenë strukturat e partisë që do të caktojnë qëndrimin që do mbahet ndaj këtyre personave, gjatë analizës së brendshme në PD.
“Foltorja ka qëllimin e vet, debat të hapur, pa filtra para kamerave me mbështetësit tanë, shënojmë kritikat që bëjnë, në mënyrë që të përmirësohemi, por do ishte jo reale nëse do pretendohej që ne me foltore ne ezaurojmë analizën e punës sonë.
Do bëhet në çdo qelizë, nuk jemi parti e gjahut të shtrigave, por as symbyllur s’jemi. Mbaruan zgjedhjet, pati nga ata që kishin marrë rrogën si deputet të PD, të tjerë anëtarë kryesie që shkuan u punësuan, u bënë drejtorë, këshilltarë në strukturat e narkoshtetit.
Pati edhe të tjerë që gjatë fushatës elektorale nuk kanë punuar asnjë ditë, pati të tjerë që shkuan me pushime, apo që punuan për PS. Këta do japin llogari, do jenë strukturat që do e përcaktojnë qëndrimin ndaj tyre, do bëjnë të gjitha propozimet, mendimet.
Do ketë diskutime, do ia themi njëri-tjetrit gjërat. Ka patur raportime për njerëz që kanë punuar kundër, por është lënë të bëhet analiza”, tha Berisha.
