Protestat e fermerëve në Greqi janë duke u përshkallëzuar, pasi fermerët duken të vendosur të vazhdojnë bllokadat edhe gjatë festave të fundvitit nëse kërkesat e tyre kryesore nuk plotësohen.
Gjatë kësaj kohe presioni ndaj qeverisë po rritet ndjeshëm. Kryeministri Kyriakos Mitsotakis ka bërë thirrje dy herë gjatë fundjavës për dialog, por mungon ende një përfaqësim i organizuar i fermerëve, duke e bërë komunikimin të vështirë.
Ndërkohë, policia përgatitet për lëvizje të reja të protestuesve që synojnë portet dhe aeroportet, ndërsa bllokadat në Rrugën Kombëtare Athinë–Selanik e kanë komplikuar rëndë qarkullimin.
Rrugët kryesore do të bllokohen për dy orë gjatë ditës ë sotme, ndërsa të mërkurën do të bllokohet porti i Volosit. Mitsotakis theksoi se qeveria është e gatshme të mbështesë fermerët “e ndershëm” dhe se fondet që u takojnë do t’u jepen të plota, por nënvizoi se ekstremizmi në protestë nuk ndihmon në arritjen e zgjidhjeve.
Në këtë klimë tensioni, dy ish-kryeministrat Kostas Karamanlis dhe Antonis Samaras ndërhynë duke shprehur mbështetje për bujqit.
