Kryetari i Partisë Demokratike, Sali Berisha si duket “u tremb” pas takimit të fundit të Ervin Salianjit me demokratët në Elbasan.
Kjo pasi paralajmëroi sot përjashtimin e ish-deputetit.
Në një konferencë për shtyp, Berisha theksoi se kishte informacione që organizator i këtij takimi, në mënyrë të tërthortë, ishte Suel Çela, një figurë e njohur për lidhjet e tij me grupe të caktuara të interesit.
Pjesëmarrja në mbledhjen e Salianjit në Elbasan ditën e djeshme ishte goxha e lartë duke shkaktuar kështu edhe valë komentesh nëse ish-deputeti po ia merr “stafetën” kreut të PD-së.
“Në të gjithë karrierën time politike dhe në ditët më të vështira kurrë nuk kam bërë kompromis me krimin. Në qoftë se e ndjek këtë betejë, pavarësisht nga çmimi që ka pasur, është vendimi më i drejtë. Vija e kuqe e Sali Berishës është ndarëse sa i përket bashkëpunimit me krimin. Që një anëtar i kooptuar i kryesisë dhe anëtar i Këshillit Kombëtar, të organizojë me Suel Çelën, kriminelin më të rrezikshëm të Elbasanit, kreut e një prej karteleve më të fuqishme në Europë, takim, kjo është absolutisht e papranueshme dhe kurrë nuk mund të kalojë”, tha Berisha.
Sipas tij “ai që ndërmerr një veprim të tillë, tejkalon vijën e kuqe dhe është përgjegjës për veten e tij. Nuk mund të pranoj asnjë formë bashkëpunimi me kartelet e drogës dhe organizatat kriminale. Sa i përket takimit që thoni ju, kemi pasur informacione që pohojnë se Suel Çela ka qenë organizator kryesor në hije I takimit. Përshëndes të gjitha strukturat e Elbasanit që e bojkotuan me neveri një takim të tillë”
