Një operacion i gjerë antidrogë i Policisë së Tiranës ka çuar në arrestimin e 22 personave, të dyshuar si pjesë e një grupi kriminal të strukturuar që merrej me trafikun dhe shpërndarjen e lëndëve narkotike. Aksioni ka pasur ndikim të fortë publik, pasi mes të arrestuarve rezultojnë edhe persona me funksione drejtuese në kompaninë telefonike ONE Albania, sipas burimeve mediatike.
Sipas të dhënave zyrtare, në pranga kanë rënë edhe Erald Sina, Drejtues i Departamentit të Zyrave dhe Pasurisë në ONE Albania, si dhe Artan Pullazi, Team Leader në të njëjtën kompani. Përfshirja e tyre ka ngritur pikëpyetje serioze mbi rolin e individëve me pozicione drejtuese në kompani të mëdha private.
Policia bën me dije se gjatë operacionit janë arrestuar: Renaldo Dalipi, Engelbert Pjetri, Armandi Hajdini, Olsi Mici, Fatjon Cela, Xhon Boci, Laert Murataj, Artan Pullazi, Erald Sina, Blerim Mali, Gentjan Vercani, Valerjos Bushi, Olkid Hajdari, Dylber Alijaj, Angjelos Mema, Majdi Musa, Jurgen Hekurani, Erdison Gjella, Abdurahman Bollati, Klodian Rrucaj, Indri Nakaj dhe Genti Kraja.
Gjatë kontrolleve në banesa dhe automjete, policia ka sekuestruar rreth 500 gramë kokainë, 10 kilogramë Cannabis Sativa, rreth 100 doza të gatshme për shpërndarje, pesë automjete, 28 telefona celularë, gjashtë peshore elektronike dhe rreth 3 mijë euro para cash.
Sipas policisë, pesë persona janë arrestuar më herët në kuadër të operacioneve të lidhura me këtë grup kriminal, ndërsa gjashtë shtetas të tjerë janë shpallur në kërkim. Hetimet po vijojnë për zbardhjen e plotë të aktivitetit kriminal, përcaktimin e roleve të secilit të dyshuar dhe verifikimin e lidhjeve të mundshme mes veprimtarisë së paligjshme dhe pozicioneve profesionale që disa prej tyre mbanin.
