Parlamenti Shqiptar është ndër të paktët, ku deputetët hyjnë me duar në xhepa dhe dalin milionerë. Gazeta “Sot”e ka denoncuar disa herë dhe ka publikuar pasuritë marramendëse të shumë prej tyre.
Por SPAK me në krye Klodian Brahon, të përzgjedhurin nën hije nga amerikanët pritet të të shkaktojë “tërmet” te pushtetarët e korruptuar, pasi do t’i godasë te pasuria, aty ku iu “dhemb” më shumë.
Braho paralajmëroi për mediat ditën e djeshme se planifikon “të garantojë që askush të mos jetë mbi ligjin dhe që të gjithë të jenë të barabartë para tij”.
“Do të përqendrohemi në çështjet aktuale dhe do të vijojmë hetimet e thelluara, përfshirë analizën e pasurive të përfituara në mënyrë të paligjshme dhe konfiskimin e tyre.
Një kusht i rëndësishëm për funksionimin e duhur të SPAK-ut është forcimi i pavarësisë dhe profesionalizmit të prokurorëve dhe hetuesve”, tha prokurori.
Braho, i cili mori detyrën më 19 dhjetor, shtoi se “do të punojmë gjithashtu për forcimin institucional të SPAK-ut dhe rritjen e kapaciteteve për mbledhjen dhe analizën e informacionit”.
“Qëllimi ynë është të rrisim besimin e publikut te drejtësia dhe këtë mund ta arrijmë vetëm duke vendosur standarde të larta në luftën kundër korrupsionit dhe krimit të organizuar”, u shpreh ai për BIRN.
Kush rrezikon?
Në shënjestrën e Brahos janë pasuritë e politikanëve dhe bashkëpunëtorëve të tyre që kanë përfituar nga kontratat publike, PPP-të dhe koncesionet e dyshimta, përfshirë kryeministrin Rama, Sali Berishën, Ilir Metën, Belinda Ballukun si edhe gjithë bashkëpunëtorët e tyre.
Klodian Braho ka trashëguar nga drejtuesi i mëparshëm Altin Dumani një sërë materialesh dhe dosjesh kyçe, që shërbejnë si bazë për hetimet e thelluara financiare, duke filluar nga dosja McGonigal, PPP-të dhe koncesionet në shëndetësi, përfshirë laboratorë, check-up, hemodializë, projekte infrastrukturore dhe energjetike , tuneli Llogarasë, rruga Thumanë-Kashar, aeroporti i Vlorës, Unaza e Madhe ku del Belinda Balluku dhe Rama, deri te inceneratori i Tiranës, ende pa përgjigje përfundimtare, pjesë e hetimeve për shpenzime dhe përfitime të dyshimta.
Aktualisht, prokurorët po hetojnë dhe Ballukun e cila akuzohet për ndërhyrje në prokurime publike në çështje të ndërtimit të rrugëve. SPAK-u i ka kërkuar parlamentit t’i heqë asaj imunitetin që të mund ta arrestojë; pritet që një vendim të merret në janar. Megjithatë, legjislativi dominohet nga Partia Socialiste , e cila ka 83 nga 140 mandatet.
Rama ka shprehur mbështetjen e tij për Ballukun; opozita ka denoncuar situatën dhe mbajti një protestë të hënën para zyrës së tij, duke kërkuar dorëheqjen e Ramës. Tubimi u organizua nga Partia Demokratike rivale – lideri i së cilës, Sali Berisha, është marrë gjithashtu i pandehur nga SPAK-u për korrupsion të dyshuar, akuza që ai i mohon.
Protestues të zemëruar më pas hodhën kokteje Molotov dhe u zotuan për protesta të mëtejshme. Balluku është zyrtarja publike me nivelin më të lartë që aktualisht po hetohet nga SPAK-u.
Një tjetër hetim në vazhdim që ka tërhequr vëmendjen e publikut është rasti i një grupi kriminal të dyshuar me bazë në Agjencinë Kombëtare të Shoqërisë së Informacionit (AKSHI), i akuzuar për drejtimin e një skeme për manipulimin e tenderëve.
AKSHI është një nga institucionet më të rëndësishme në vend. Ai menaxhon pothuajse të gjithë sistemin e qeverisjes digjitale përmes portalit e-Albania, duke vepruar njëkohësisht si ndërmjetës mes qytetarëve dhe institucioneve të ndryshme për lëshimin e dokumenteve online.
Kritikët thonë se çështja është veçanërisht shqetësuese sepse nxjerr në pah lidhje të dyshuara mes krimit dhe institucioneve shtetërore. Vetëm vitin e kaluar, SPAK-u thotë se ka vënë nën hetim 33 ish-zyrtarë të lartë publikë, 19 prej të cilëve janë dërguar për gjykim.
Mes tyre përfshihen disa figura të rëndësishme politike: Berisha, një figurë qendrore e politikës shqiptare që nga rënia e komunizmit në fillim të viteve 1990, është aktualisht në gjyq për korrupsion.
Një tjetër ish-president, Ilir Meta, dhe bashkëshortja e tij, ish-deputetja Monika Kryemadhi, po ashtu po gjykohen për akuza për korrupsion, pastrim parash dhe fshehje pasurie. Kryetari i Bashkisë së Tiranës, Erion Veliaj, një aleat politik i Ramës, ndodhet në paraburgim për akuza të ngjashme, ndërsa ish-zv/kryeministri Arben Ahmetaj është në arrati nga një hetim për korrupsion dhe pastrim parash.
Në listën e SPAK ka dhe emra të tjerë që do të dalin në vijim. Mbetet të shohim nëse Klodan Braho do të sjellë ndryshimin që kërkojnë shqiptarët dhe partnerët ndërkombëtarë, përfshirë amerikanët.
Pasi emra të mëdhenj po bien një nga një, por pyetja që nuk merr përgjigje është e njëjta: po paratë? Arrestimi nuk i kthen automatikisht miliardat e dyshuara si të vjedhura.
Një politikan mund të bëjë muaj ose vite burg, të dalë më pas “i penduar” ose “i rehabilituar”, por leket nuk dalin bashkë me të nga burgu.
Ato nuk shfaqen në buxhetin e shtetit, nuk rikthehen në xhepin e qytetarit, nuk riparojnë rrugët, shkollat apo spitalet. Braho me vizionin e tij pritet të shkaktojë tronditje të thella në qeveri dhe opozitë. SOT.COM.AL
