Në këtë fundvit, qeveria shqiptare ka ndërmarrë nismën e amnistisë penale, e cila i jep lirinë 380 personave të dënuar me burg.
Kjo nismë pritet të ndikojë drejtpërdrejt në sistemin e burgjeve, ndërsa ministria e Drejtësisë e drejtuar nga Besfort Lamallari thotë se amnistia ka për qëllim parimet e humanizmit dhe afrimin me standardet evropiane.
I njëjti lajm gjithashtu është publikuar dhe nga kryeministri Edi Rama ku theksohet se përveç lirimit të menjëhershëm për një numër të caktuar personash, 900 të tjerë marrin ulje dënimi si dhe popullimi i burgjeve do të ulet me gati 7%.
“Ministri i Drejtësisë, Besfort Lamallari, komunikon nismën e Qeverisë Shqiptare për amnistinë e ndërmarrë si një akt i frymëzuar nga humanizmi, drejtësia sociale dhe standardet europiane.
Pjesë e një politike penale moderne, që synon rehabilitimin, uljen e mbipopullimit në burgje dhe forcimin e sigurisë afatgjatë, amnistia hap rrugën që 380 persona të përfitojnë lirim të menjëhershëm dhe rreth 900 të tjerë ulje dënimi, duke ulur në këtë mënyrë edhe popullimin në burgje me gati 7%.
Të vendosur deri në fund për një drejtësi të drejtë, që mishëron sundimin e ligjit dhe humanizmin e respektin për dinjitetin njerëzor, sipas standardeve demokratike europiane”, thuhet në postimin e Ministrisë së Drejtësisë.
