Trump mesazh liderëve autoritarë kudo që janë
Presidenti i Shteteve të Bashkuara, Donald Trump, ka lëshuar një paralajmërim të hapur për të gjithë udhëheqësit autoritarë, të cilët, sipas tij, rrezikojnë jetën, sigurinë apo interesat e qytetarëve amerikanë. Në përmbyllje të konferencës së jashtëzakonshme për shtyp pas operacionit ushtarak që çoi në arrestimin e Nicolás Maduro-s, Trump e bëri të qartë se skenari i Venezuelës nuk ishte i vetmi në tavolinë.
“Ata që vënë në rrezik jetën e amerikanëve do të ndëshkohen. Sanksionet ndaj Venezuelës do të mbeten në fuqi. Po ashtu, do të mbetet aktiv opsioni ushtarak. Ajo që i ndodhi Nicolás Maduro-s mund t’u ndodhë edhe liderëve të tjerë”, tha ai.
Presidenti shtoi se kapja e Maduro-s është një mesazh i qartë se SHBA ka rifituar pozicionin dominues në rajonin e vet. “Po riafirmojmë fuqinë amerikane në hemisferën perëndimore”, tha Trump, duke iu referuar rikthimit të Doktrinës Monroe, e cila synon mbrojtjen e rajonit nga ndikimet armiqësore dhe regjimet që minojnë sigurinë.
Trump nuk ngurroi të përmendte emra specifikë. Në drejtim të Kolumbisë, ai u shpreh se presidenti Gustavo Petro “duhet të ketë kujdes”, duke e akuzuar për përfshirje të drejtpërdrejtë në prodhimin dhe dërgimin e kokainës drejt SHBA. Ndërsa për Kubën, ai tha se është një “shtet në dështim” dhe çështja e saj do të hapet së shpejti në mënyrë të drejtpërdrejtë.
“Diktatori dhe terroristi Nicolás Maduro është ndaluar. Populli i Venezuelës është sërish i lirë. Amerika është më e sigurt sot dhe hemisfera perëndimore po kthehet në një vend më të qëndrueshëm,” tha Trump.
Në të gjitha deklaratat e tij, presidenti nënvizoi se ndërhyrja në Venezuelë nuk ishte as altruizëm diplomatik dhe as një veprim humanitar i izoluar. Ai e përshkroi qartazi si demonstrim force, rikthim të kontrollit mbi burimet strategjike si nafta, dhe rivendosje të dominimit amerikan në rajon.
Kjo përbën një kthesë të madhe në politikën e jashtme amerikane, një doktrinë e re, që për SHBA-në të Trump-it, fuqia dhe frika zëvendësojnë durimin dhe negociatat. /Pamfleti
