Nga Integrimi, te sinjalizimi i largimit nga politika dhe akuzat për ata që e rrethojnë, Rama përgatit surpriza në mbledhjen e grupit socialist…
Mbledhja e grupit parlamentar të Partisë Socialiste nesër paradite pritet të ketë shumë surpriza. Përveç retorikës së zakonshme për ata që hanë kumbulla pas shpine, pritet që Rama të vendosë një bast të madh, ku flitet se do të shpallë edhe ‘datën’ e largimit të tij nga politika.
Sipas burimeve nga PS, Edi Rama pritet të deklarojë se do të largohet nga politika jo kur të ndodhë anëtarësimi në BE, por pas mbylljes së të gjithë kapitujve.
Plani është që ratifikimi për mbylljen e kapitujve të bëhet në vitin 2027. Dhe sipas burimeve, brenda mazhorancës, mësohet se kryeministri do të deklarojë se në momentin që BE do të shpallë vendimin politik për të pranuar Shqipërinë, ai do të tërhiqet nga politika.
Nga ana tjetër Rama do të deklarojë se nëse BE nuk do ta fusë në axhendë anëtarësimin e Shqipërisë, ai do të largohet menjëherë, duke mbajtur një qëndrim kritik ndaj Bashkimit Europian dhe Perëndimit.
Shkurt, Edi Rama nesër pritet të jetë i prerë dhe kritik, duke luajtur edhe lojën e viktimës, që sipas tij ka një platformë politike që kërkon largimin e tij, duke e lidhur edhe me qarqe ballkanike.
Aleanca me Italinë dhe Giorgia Melonin do të shpallet si strategjike dhe si një digë gjeopolitike ndaj Athinës. Për të cilën Rama pritet të mbajë një fjalë të gjatë edhe për kanalin energjetik Durrës–Bari, nëpërmjet parave të Emirateve të Bashkuara.
Nga ana tjetër ai pritet të sulmojë ashpër Athinën si një kancelari që kërkon kontrollin politik në Tiranë, duke bërë të ditur se do ta ndalojë këtë operacion.
Por teksa do të na tregojë se kur do të largohet, pikëpyetja apo dilema që shtrohet është nëse do të shpallë pasardhësin apo nisjen e një fushate për zgjedhjet e reja në Partinë Socialiste?
Informacionet që vijnë nga mazhoranca thonë se Edi Rama e ka menduar edhe këtë fazë, që konsiderohet mjaft e komplikuar. Pasi pritet të japë propozimin e tij për kreun e ardhshëm të PS-së, që siç e ka thënë vetë, do të jetë grua. Ku profili i Lea Ypit po shikohet gjithnjë e më shumë si variant i mundshëm.
Por kryeministri mendohet se e ka kthyer largimin e tij në një grackë. Siç thuhet, në verën e këtij viti pritet të bëhen reformat e mëdha në Kuvend dhe pazari me Berishën për reformën territoriale është arritur. Dyshimet janë se Rama do t’i plotësojë tekat PD-së për shtimin e bashkive (priten 90), në këmbim të votës për të ndryshuar Kushtetutën dhe të vendoset që presidentin ta zgjedhë populli me votë.
Me shumë gjasë vetë Rama do të hyjë në garë për president dhe nëse dështon varianti i BE, Babloku do na kthehet si Erdogani duke marrë mandate pafund.
Ndërkaq, po nesër Edi Rama pritet të sulmojë kupolën e grupit parlamentar socialist, por jo vetëm. Siç mësohet, kryeministri pritet të akuzojë zyrtarët e lartë të PS-së që e konsiderojnë partinë si plaçkë. Madje mësohet se Edi Rama do të deklarojë se kush nuk e konsideron veten bashkëvuajtës apo bashkëfajtor të të mirave dhe të këqijave në mazhorancë, duhet të largohet.
Edi Rama pritet të thotë se PS nuk është parti e përfituesve, por ushtria e integrimit europian, ku do të ketë edhe të ‘plagosur’ apo të ‘vrarë’. “Dëshmorët e integrimit do të nderohen përjetë, dezertorët do të ekzekutohen që tani”, mësohet se do të jetë formula.
Po kush janë realisht dezertorët? Të presim ditën e nesërme! /Pamfleti
