Kjo fundjavë janari do të jetë me mot të qëndrueshëm. Sinoptikanët parashikojnë se prezente do të jenë vranësirat, por nuk do të gjenerojnë reshje.
“Parashikohet që territoret shqiptare në pjesën më të madhe të tij, të jetë në mbizotërimin e kushteve të qëndrueshme atmosferike, duke bërë që të kemi vranësira të shpeshta herë pas here, por gjithashtu të kemi dhe intervale me kthjellime. Më të dukshme priten të jenë përgjatë ditës së shtunë, kryesisht gjatë orëve të para të mëngjesit, në vijën bregdetare priten të jenë më prezente, ndërsa në pjesën tjetër të territorit vranësirat do të jenë të shpeshta.
Herë pas here, kryesisht në zonat jugore, do të jenë disi më të dukshme, duke bërë që të kemi edhe momente të pakta me pika shiu në zona të izoluara, por që do të jenë reshje komplet afatshkrurtra, e nuk do të jenë reshje problematike”, u shpreh sinoptikani Hakil Osmani.
Sa i përket temperaturave të ajrit, ato do të pësojnë ndryshime, pasi të shtunën do të ketë një rritje të tyre, por ndryshe do të ndodhë të dielën.
“Pritet që të kemi rritje të tyre të pakët, deri në orët e para të mëngjesit të ditës së shtunë dhe gjatë mesditës, duke bërë që maksimumet të regjistrohen edhe në vlerën 18°C në Ultësirën Perëndimore, në zonat malore do të kemi maksimumet të cilat afrohen shumë pranë vlerave 13°C apo 14°C.
Dita e diel pritet të sjellë një rënie të temperaturave të ajrit, duke bërë që minimumet në qytetet e zonave malore të jenë në -2°C apo -3°C, ndërsa maksimumet të zbresin rreth 15°C apo 16°C në orët e mesditës”, sqaron sinoptikani.
Edhe fillimi i javës tjetër parashikohet që të mos ketë reshje në mbarë vendin, por temperaturat do të ulen me disa gradë, duke bërë që në zonat malore temperaturat minimale të zbresin në zero.
