Arianit Sllamniku është arrestuar pasditen e së martës.
Emri i tij eshte shume i lakuar ne Kosove, pasi vite me pare ka kandiduar per deputet ne parlamentin e Republikes se Kosoves. Ai pretendon se mund të shërojë autizmin duke larguar parazitët nga trupi i njeriut, me medikamente që zakonisht janë të destinuara për kafshë, e jo për njerëz.
Sllamniku është ndaluar për 48 orë, me vendim të Prokurorisë në Gjilan.
Sipas kryeprokurorit të Prokurorisë në Gjilan, Arben Kadriu, Sllamniku dyshohet për veprat penale “Ushtrim të kundërligjshëm të veprimtarisë mjekësore ose farmaceutike” nga neni 256 i KPRK-së dhe “Eksperimente të kundërligjshme mjekësore dhe testime të barnave” nga neni 257 i KPRK-së.
Më herët, Policia në Gjilan iu bëri thirrje qytetarëve që mund të kenë marrë ‘shërbime e konsulta’ te ai që të shkojnë në stacion për intervistim me qëllim zbardhjen e rrethanave të rastit.
Lidhur me veprimtarinë e tij ka reaguar edhe Ministria e Shëndetësisë.
Në reagimin e saj, Ministria ka shprehur shqetësim për këto raportime dhe u ka bërë thirrje qytetarëve që t’u besojnë vetëm metodave të verifikuara shkencërisht, të cilat ofrohen nga institucione dhe profesionistë shëndetësorë të licencuar
MSH ka bërë të ditur se për këtë rast ka njoftuar institucionet kompetente dhe se është në koordinim të vazhdueshëm me Policinë e Kosovës për trajtimin e mëtejmë të çështjes, në përputhje me kompetencat ligjore.
“Shëndeti i fëmijëve mbetet prioritet absolut dhe çdo keqpërdorim që e rrezikon atë do të trajtohet me seriozitet të lartë institucional”, thuhet në reagimin e Ministrisë së Shëndetësisë./Paparaci
