Universiteti “Aleksandër Moisiu” ka dhënë lajmin e trishtë të ndarjes nga jeta të pedagoges së finacës dhe kontabilitetit, Shqipe Xhaferri.
Universiteti Aleksandër Moisiu ka nderuar figurën e pedagoges, teksa në faqen zyrtare, shkruan se ishte një figurë e respektuar akademike dhe se ka dhënë një kontribut të çmuar në fushën e financës dhe kontabilitetit.
Bëhet me dije se ceremonia e varrimit do të zhvillohet ditën e sotme, në orën 16:00.
Newsbomb.al i shpreh ngushëllime familjarëve për humbjen e njeriut të tyre të afërm.
Postimi i Universitetit Aleksandër Moisiu:
Me dhimbje të thellë dhe trishtim të madh njoftojmë ndarjen nga jeta të pedagoges sonë të nderuar, Prof. As. Dr. Shqipe Xhaferri.
Prof. Xhaferri ishte një figurë e respektuar akademike e Universitetit “Aleksandër Moisiu” Durrës, e cila për vite me radhë dha një kontribut të çmuar në fushën e financës dhe kontabilitetit, duke formuar me përkushtim breza studentësh dhe duke lënë gjurmë të rëndësishme në jetën akademike dhe institucionale të universitetit tonë. Profesionalizmi, korrektësia shkencore dhe përkushtimi i saj ndaj dijes do të mbeten një shembull frymëzues për kolegët dhe studentët.
Ceremonia e varrimit do të zhvillohet ditën e sotme, e dielë, datë 25.01.2026, ora 16:00.
Pritja dhe përcjellja bëhen pranë Shtëpisë Mortore “LEBA”, Durrës.
Universiteti “Aleksandër Moisiu” Durrës shpreh ngushëllimet më të sinqerta familjes, të afërmve, miqve dhe kolegëve të saj.
Kujtimi dhe vepra e Prof. As. Dr. Shqipe Xhaferri do të mbeten gjithmonë të gjalla në komunitetin tonë universitar.
E paharruar.
Pedagogia Shqipe Xhaferri
