Një avion ushtarak transportues i Katarit, i cili po transportonte personel sigurie për forcimin e masave gjatë Lojërave Olimpike Dimërore, u përplas me një shtyllë ndriçimi të dielën, gjatë procedurës së uljes në aeroportin Malpensa të Milanos.
Sipas Guardian, avioni po transportonte 104 anëtarë të forcave elitare të sigurisë së Katarit, si edhe mjete të rënda, automjete të mëdha tip SUV dhe snowmobile, në kuadër të një marrëveshjeje bashkëpunimi me qeverinë italiane, pavarësisht se Katari nuk merr pjesë në këto lojëra.
Një burim nga Ministria e Brendshme italiane deklaroi se forcat e sigurisë së Katarit janë të angazhuara “kryesisht në një rol trajnues”. “Katari është një partner thelbësor në planin e sigurisë dhe çdo interpretim negativ i marrëveshjes është i pabazë”, shtoi burimi.
Qeveria italiane ka angazhuar rreth 6.000 efektivë policie nga struktura të ndryshme, me mbështetjen si të personelit nga Katari ashtu edhe të përfaqësuesve të ICE, në kuadër të përgatitjeve për zhvillimin e lojërave.
Sipas të njëjtave burime, avioni katarian C-17 Globemaster II goditi lehtë shtyllën e ndriçimit pas një manovrimi të gabuar gjatë fazës së lëvizjes mbrapa pas uljes.
Pavarësisht incidentit, në aeroport ishte organizuar një ceremoni zyrtare pritjeje, me pjesëmarrjen e ambasadorit të Katarit në Itali dhe zyrtarëve lokalë.
Më pas, i shoqëruar nga automjete patrullimi të policisë italiane, një konvoj SUV-sh dhe mjetesh të blinduara me mbishkrimin “State of Qatar – Lekhwiya” kaloi nëpër qendrën e Milanos, duke kaluar nga Duomo dhe duke bërë një ndalesë të shkurtër në San Siro, ku do të mbahet ceremonia hapëse e lojërave.
