Teksa Prokuroria e Posaçme (SPAK) pret miratimin e Këshillit të Mandateve për të proceduar me arrestimin e saj, zv/kryeministrja Belinda Balluku vijon të kryejë emërime në poste drejtuese me persona të afërt të saj dhe të bëjë qoka. Së fundmi, Artan Shkreli është larguar nga detyra si drejtor i Institutit të Ndërtimit dhe në vend të tij është emëruar Persida Shkrepa. Lajmi është bërë publik dje nga vetë Balluku përmes një postimi në rrjetet sociale, ku i ka uruar suksese në detyrën e re. “Me një karrierë të spikatur si arkitekte, profesionalizmi, përkushtimi dhe përvoja e saj janë një garanci e fortë për drejtimin dhe zhvillimin e këtij institucioni kaq të rëndësishëm, si edhe për forcimin e rolit të tij në shërbim të industrisë së ndërtimit në vend”, shkruan Balluku. Por, paralelisht me këtë emërim, Balluku kërkon të vendos në krye të Komisionit të Prokurimit Publik një tjetër person të besuar të saj. Sipas raportimeve në media bëhet fjalë për Irma Drobonikun, e cila rezulton të jetë e përfshirë në të paktën dy dosje nën hetim nga SPAK. Emri i Drobonikut është propozuar së fundmi në Kryeministri si kandidate për kryetare të Komisionit të Prokurimit Publik (KPP), ndërkohë që Balluku këmbëngul për emërimin e saj në këtë post. Irma Droboniku njihet gjithashtu si lidhje e afërt shoqërore me Viola Haxhiademin (sërish e besuar e Ballukut), e emëruar së fundmi në krye të KESH.
Balluku i bën nderin e dytë të jetës Bashkim Ulajt
Por nuk ndalet me kaq. Në datën 16 janar 2026, Belinda Balluku i ka bërë nderin e dytë të madh të jetës biznesmenit Bashkim Ulaj, duke i dhënë një “llokmë”. Nderi i parë ishte firmosja e koncesionit të rrugës Thumanë – Kashar. Ndërkohë, në kulmin e procedurave ligjire në Kuvend dhe në Gjykatën Kushtetuese për imunitetin, ministrja e Infrastrukturës dhe Energjisë ka firmosur pas një kalvari 13 mujor lejen e ndërtimit të resortit turistik “Blue Borgo”, i ndodhur në fshatin Baks Rrjoll, në Bashkinë Shkodër. Ministrja me disa akuza mbi shpinë, ka sfiduar hapur çdokënd, nga banorët e zonës në Baks, të cilët u ngritën në protesta, prokurorët, deputetët apo edhe anëtarët e Gjykatës Kushtetuese. Me një të rënë të lapsit, Balluku i dha biznesmenit Ulaj, plot 146 hektarë në zonën ranore në afërsi të Velipojës, teksa koha dhe mënyra e firmosjes së kësaj leje është tepër e dyshimtë. “VoxNews” ka mësuar se, krerët e shtetit kanë ngurruar për muaj me radhë për të firmosur këtë leje gjigande, duke qenë se banorët e Baks Rrjoll kanë bërë padi në gjykatë dhe kallëzime në Prokurorinë e Posaçme për tjetërsime pronash. Por, në këto kohë, ministrja Balluku nuk ka asgjë për të humbur, duke parë këmbënguljen e Prokurorisë së Posaçme për ta vënë nën akuzë apo për t’i vendosur një masë shtrënguese sigurie.
Redaksia e VoxNews ka zbardhur ekskluzivisht këtë leje ndërtimi, e cila qendrontenë zyrat e Këshillit Kombëtar të Territorit dhe Ujit. Ministrat e linjës, sidomos ata të Mjedisit dhe Turizmit, kanë ngurruar për të vendosur firmën e tyre, nga frika e një hetimi të mundshëm të SPAK-ut. Por, ja ku vjen sërish ministrja Balluku, e cila në një kohë shumë të trazuar, vendos emrin, vulën dhe firmën e saj. Pas kësaj firme, Agjencia e Zhvillimit të Territorit ka zbardhur me shpejtësi këtë leje ndërtimit, për objektin “resort turistik blue borgo me 33 struktura akomoduese dhe shërbimi me 3 dhe 10 kate mbi tokë dhe një kat nëntokë, 1 strukturë akomoduese tip hotel me 1 dhe 3 kate mbi tokë dhe 1 kat nëntokë, 3 struktura social kulturore me 1 dhe 3 kate mbi tokë”, Bashkia Shkodër, me subjekt zhvillues “Aba Blue Borgo”.
Në dokumentet që ka hulumtuar VoxNews përcaktohet se zona ku zhvillohet masterplani ka një sipërfaqe prej 146 ha. “Ekziston një rrugë e re lidhëse që kalon përmes zonës, duke e ndarë atë në një zonë të pjerrët me sipërfaqe 89 ha, dhe një zonë të sheshtë ku do të vendoset struktura akomoduese. Vendi është i aksesueshëm me lidhje ndërkombëtare dhe kombëtare me transport privat” thuhet në dokument. Sipas saj, i gjithë totali i ndërtimit është përqëndruar në masterplanin e propozuar në zonën e sheshtë të pronës. “Masterplani i propozuar ka një total ndërtimi mbi tokë prej 404,612.50 m2. Projekti parashikon zhvillimin e një kompleksi multifunksional në një zonë bregdetare, i cili përfshin një gamë të gjerë strukturash dhe shërbimesh të larmishme për të plotësuar nevojat e vizitorëve dhe banorëve” vijon dokumenti. Pra, në një zonë gjigante me sipërfaqe prej 1,460,549.8 m2 do të vendoset ky resort.
Në një kohë që opinioni publik mbushej me lajmet e seancave në Këshillin e Mandateve, në Gjykatën Kushtetuese apo edhe vendime të Prokurorisë së Posaçme, ministrja Belinda Balluku ka vepruar me shpejtësi dhe ka fituar kohë që të firmosë “nderin” e dytë për Ulajn. Në datën 23 janar 2026, kompania e Ulajt regjistroi në Qendrën Kombëtare të Biznesit lejen e ndërtimit të zbardhur nga KKTU. Sipas dokumentit që ka siguruar ekskluzivisht VoxNews, shoqëria “ABA Blue Borgo” i kërkoi QKB-së kërkesë për hapje të adresës sekondare të ushtrimit të aktivitetit. Kërkesën e bëri administratorja Ledi Hysenaj, e cila kërkonte me ngum që të hapej adresa në zonën e Baks Rrjoll, Bashkia Shkodër. Administratorja kërkonte të regjistronte lejen e ndërtimit për resortin “Blue Borgo”, “sipas lejes së ndërtimit nr. 360/1 prot, datë 15.01.2026, të Këshillit Kombëtar të Territorit dhe Ujit”.
VoxNews ka mësuar se kompania që do të ndërtojë resortin është regjistruar disa vite më parë në QKB. Janë bërë disa transaksione mes biznesmenit Bashkim Ulaj, i cili ka marrë dhe ka shitur disa aksione te familjarë dhe njerëz të afërt të tij. Ka dyshime se transaksionet janë formale, ku në disa raste është edhe për të humbur gjurmët nga pronari fillestar. Fillimisht, i besuari i tij Andri Kasneci e regjistroi kompaninë në emër të tij dhe pas nxjerrjes dhe kërkesave për leje në KKTU, aksionet i kanë kaluar më pas Bashkim Ulajt. vox news
Comments are closed.