Çanta që shihni në foto është ajo e autorit 58-vjeçar i cili në kërcënimin e armës arriti që të merrte një shumë të konsiderueshme parash.
Siç shihet dhe në pamje Bardhyl Fusha, me origjinë nga Librazhdi por prej kohësh banues në Tiranë ka arritur që të marrë nga arka e bankës së nivelit të dytë shumëm prej 20 milionë lekësh të vjetra.
Parate qe iu gjeten 58 vjecarit
Newsbomb Albania siguroi më herët edhe pamjet nga momenti kur efektivi i Policisë me pistoletë në dorë neutralizoi 58-vjeçarin Bardhyl Fusha, i cili rreth orës 11:15 të kësaj të enjte ka tentuar që të grabisë një bankë të nivelit të dytë.
Siç shihet dhe në pamjet e mëposhtme efektivi i Policisë ka drejtuar pistoletën drejt 58-vjeçarit duke i bërë thirrje këtij të fundit që të ulë armën. 58-vjeçari Bardhyl Fusha i armatosur u fut ditën e sotme në ambientet e “Fibank”, e pozicionuar te Pallatet Delijorgji.
Autori, me origjinë nga Librazhdi por që prej kohësh jetonte në Tiranë, pasi është futur në institucionin financiar, ai ka qëlluar një herë në tokë për të trembur punonjësit e bankës në mënyrë që t’i jepnin paratë. Pas kërcënimeve që i bëri punonjësve ai arriti që të merrte nga arka një shumë të konsiderueshme parash, mirëpo plani i tij shkoi “huq” pasi policia e priste te dera.
Kanë qenë efektivët e Komisariatit nr.2 ata të cilët menjëherë e prangosën dhe i sekuestruan armën që kishte me vete si dhe çantën të mbushur me para që mbante mbi shpinë.
Lidhur me këtë ngjarje Policia përmes një reagimi zyrtar bëri me dije se fatmirësisht nga të shtënat nuk ka pasur persona të lënduar.
“Rreth orës 11:15, në Rrugën e Kavajës, shtetasi B. F., rreth 58 vjeç, dyshohet se ka hyrë në ambientet e një banke, me qëllim vjedhjen e saj, duke qëlluar me armë zjarri, në dysheme. Nga të shtënat nuk ka shtetas të dëmtuar.
Shërbimet e Policisë kanë ndërhyrë menjëherë pas marrjes së njoftimit dhe kanë bërë të mundur kapjen e autorit të dyshuar në tentativë për tu larguar nga vendi i ngjarjes. Autori i dyshuar është shoqëruar në Komisariat. Gjithashtu, është sekuestruar arma e zjarrit. Në përfundim të veprimeve hetimore do të jepet informacion më i plotë për rastin”, njoftoi Policia.
