Rigels Seliman
Prokuroria e Posaçme (SPAK) dridh themelet e politikës dhe administratës shqiptare me një paralajmërim të fortë që tingëllon si kambanë alarmi për çdo zyrtar publik. Prokuroria e Posaçme ka rikujtuar publikisht kompetencat e saj, duke sinjalizuar se beteja kundër korrupsionit dhe abuzimeve me tenderat ka hyrë në një fazë të re dhe më agresive. Në fokus janë procedurat publike ku cenohet liria e garës dhe barazia e pjesëmarrësve, sidomos kur krijohen privilegje të padrejta në tendera mbi 800 mijë lekë.
“SPAK heton veprat penale që cenojnë lirinë e pjesëmarrjes dhe barazinë e shtetasve në tendera dhe ankande publike, në rastet kur krijohen avantazhe apo privilegje të padrejta dhe kur vlera e tenderit është mbi 800 mijë lekë (ose në të njëjtën vlerë në monedhë të huaj)”, shkroi dje SPAK në faqen e saj zyrtare në rrjetet sociale. Pra mesazhi është i qartë: askush nuk është i paprekshëm.
Nga nëpunësi më i thjeshtë që firmos dokumente, deri te zyrtarët “VIP” që marrin vendime kyçe, të gjithë mund të përfundojnë në rrjetën e hetimeve nëse shkelin ligjin. Po ashtu, SPAK ka bërë të ditur se heton çdo rast korrupsioni ku përfitimi apo dëmi kalon mbi 50 mijë lekë, duke vendosur një prag të qartë për ndërhyrje. “Prokuroria e Posaçme është kompetente për të hetuar rastet e korrupsionit të zyrtarëve publikë, kur vlera monetare e përfitimit apo dëmit kalon mbi 50 mijë lekë (ose ekuivalenti në valutë)”, shprehet SPAK në rrjetet sociale.
Prapaskenat
Ndërkohë burime pranë hetimeve flasin për një skemë të detajuar monitorimi dhe mbledhjeje provash, ku çdo hallkë e zinxhirit administrativ mund të vihet nën lupë. Hetimet pritet të fokusohen jo vetëm tek firmat fituese, por edhe tek procedurat, dokumentacioni dhe komunikimet që çojnë në shpalljen e fituesve. Çdo avantazh i padrejtë, çdo favor i fshehtë dhe çdo marrëveshje nën tavolinë mund të kthehet në provë penale. Në një postim të 6 shkurtit 2026, SPAK theksoi se vepron në mënyrë të pavarur dhe bazuar vetëm në prova, duke dërguar një mesazh të fortë për politikën: presionet nuk ndikojnë në hetime. Ky qëndrim shihet si një garanci për publikun, por edhe si një paralajmërim për ata që kanë abuzuar me fondet publike.
Klima politike duket e tensionuar, ndërsa çështjet e tenderave dhe korrupsionit mbeten në qendër të debatit. Nga ana tjetër, lëvizja e SPAK interpretohet si një sinjal se dosje të reja mund të hapen dhe emra të njohur mund të dalin para drejtësisë. Institucioni po kërkon të qartësojë rolin e tij dhe kufijtë e ndërhyrjes ligjore, por mesazhi që përçohet është shumë më i fortë: lufta kundër korrupsionit nuk do të ndalet.
Me këtë qasje, Prokuroria e Posaçme (SPAK) duket se po shtrin “grackën” ligjore në çdo nivel të administratës, duke rritur frikën tek ata që kanë përfituar padrejtësisht nga fondet publike. Pra nëse paralajmërimet do të shoqërohen me goditje konkrete, atëherë skena politike dhe institucionale mund të përballet me një valë të re tronditjesh. Megjithatë mbetet të shihet në ditët në vijim se çfarë do të ndodhë më konkretisht, teksa theksojmë se reagimi i djeshëm i Prokurorisë Speciale vjen nj ditë pas takimit të Drejtorit të Zyrës për Europën dhe Azinë i Byrosë së Çështjeve Ndërkombëtare të Narkotikëve dhe Zbatimit të Ligjit të Departamentit të Shtetit, Mark Tervakoski me kreun e SPAK, Klodjan Braho.sot.com.al
