Një 28-vjeçar ukrainas, i identifikuar si Igor Komarov, është rrëmbyer në Bali të Indonezisë, ndërsa disa ditë pas zhdukjes së tij është publikuar një video tronditëse ku kërkohet shpërblim prej 10 milionë dollarësh.
Sipas mediave ndërkombëtare, Komarov dyshohet të jetë djali i një figure të njohur të botës së krimit në Kramatorsk, i njohur me nofkën “Komar”. Ai kishte udhëtuar në Bali për pushime së bashku me të dashurën e tij, influencuesen ukrainase Yeva Mishalova, 25 vjeç, si dhe një mik të tyre.
Videoja e shpërblimit
Në videon e publikuar, Komarov shfaqet i mavijosur dhe me shenja të dukshme dhune, teksa lexon një mesazh ku i kërkon nënës së tij të paguajë 10 milionë dollarë.
“Mama, të lutem, më ndihmo. Jepu 10 milionë dollarët që kërkojnë”, dëgjohet të thotë ai në video, duke pretenduar se është dhunuar rëndë nga rrëmbyesit.
Autoritetet nuk kanë konfirmuar nëse Komarov është ende gjallë.
Zbulimi i mbetjeve njerëzore
Ekspertët mjeko-ligjorë kanë bërë të ditur se mbetje njerëzore të gjetura pranë grykëderdhjes së lumit Wos janë rreth tre ditë të vjetra. Megjithatë, ende nuk është konfirmuar zyrtarisht nëse ato i përkasin 28-vjeçarit.
Policia e Balit, në bashkëpunim me konsullatën ukrainase, ka nisur testet e ADN-së. Nga nëna e Komarovit është marrë mostër biologjike për krahasim.
Dyshime për rrjet kriminal ndërkombëtar
Hetimet kanë çuar në identifikimin e shtatë shtetasve të huaj si të dyshuar. Një prej tyre, i identifikuar me inicialet “CH”, është ndaluar pasi dyshohet se ka përdorur pasaportë të falsifikuar dhe ka marrë me qira automjete të përdorura në rrëmbim.
Gjashtë persona të tjerë, të identifikuar me inicialet RM, BK, AS, VN, SM dhe DH, janë shpallur në kërkim. Policia dyshon se ata janë pjesë e një rrjeti kriminal transnacional, me lidhje të mundshme edhe me një njësi nga rajoni i Çeçenisë në Rusi.
Sipas autoriteteve, katër prej të dyshuarve janë larguar nga Bali përmes aeroportit ndërkombëtar, ndërsa dy besohet se ndodhen ende në ishull. Një operacion ndërkombëtar me përfshirjen e Interpol-it është në zhvillim për kapjen e tyre.
Hetimet vijojnë
Policia deklaron se rrëmbimi dyshohet të ketë ndodhur në një vilë në rajonin Tabanan, ku janë gjetur gjurmë gjaku që përputhen me provat e mbledhura në një nga automjetet e përdorura.
Autoritetet indoneziane theksojnë se hetimet janë në vijim dhe se identiteti i mbetjeve njerëzore do të konfirmohet vetëm pas përfundimit të analizave mjeko-ligjore.
Comments are closed.