Një ditë pas mbledhjes së Kryesisë, Rama mbledh sot në seli deputetët socialistë të Tiranës

Kryeministri Edi Rama do të zhvillojë këtë të mërkurë një takim me deputetët socialistë të qarkut të Tiranës. Burime për mediat bëjnë me dije se kreu i qeverisë dhe njëkohësisht kryesocialisti do të mbledhë deputetët në orën 14:00 të ditës së sotme.

Ky takim i Ramës me socialistët në selinë rozë, vjen një ditë pas mbledhjes së Kryesisë së Partisë Socialiste, aty ku dhe ai u caktoi disa porosi të qarta.

Kryeministri Edi Rama mëngjesin e së martës mbajti për rreth gjysmë ore deputetët dhe ministrat e PS-së, ku dhe u ndalën kryesisht në çështjet organizative, por diskutuan dhe për caktimin e datës për Asamblenë e Partisë Socialiste.

Rama u ka kërkoi deputetëve që të dalin në terren dhe të zhvillojnë takime me qytetarët, me qëllim për të kuptuar shqetësimet e tyre.

Një vëmendje e veçantë iu kushtua edhe luftës në Lindjen e Mesme. Edi Rama u kërkoi deputetëve të vet që të jenë vigjilent për rritjen e çmimeve që mund të vijnë për shkak të konfliktit dhe përshkallëzimit të saj. Ai kërkoi që të mos lejohet të abuzohet me çmimet dhe të gjithë të jenë “sy e veshë”, me qëllim mos ndikimin e tyre te qytetarët.