Bota e televizionit është në zi pas lajmit për ndarjen nga jeta të aktorit Corey Parker, i cili u shua në moshën 60-vjeçare pas një beteje me kancerin.
Sipas mediave amerikane, ai ndërroi jetë të enjten në Memphis, Tennessee. Lajmi u konfirmua për TMZ nga tezja e tij, Emily Parker, ndërsa nuk janë bërë të ditura detaje për llojin e sëmundjes nga e cila vuante.
Parker u bë i njohur për publikun falë paraqitjes së tij në sitcom-in e famshëm Will & Grace, ku u shfaq në pesë episode duke interpretuar personazhin Josh, një nga partnerët e Grace Adler, rol i luajtur nga aktorja Debra Messing. Gjatë karrierës së tij artistike, ai mori pjesë edhe në disa filma dhe seriale të njohura, mes tyre Biloxi Blues, White Palace, The Love Boat: The Next Wave, Nashville dhe Blue Skies. Ai fitoi vëmendje të madhe që në vitet ’80 kur interpretoi personazhin Pete në filmin horror Friday the 13th Part V: A New Beginning. Në vitin 1986 ai luajti përkrah aktores Kim Basinger në dramën romantike 9½ Weeks.
Në vitin 1992, Parker ishte gjithashtu pjesë e sitcom-it Flying Blind, ku interpretoi rolin e Neil Barras përballë aktores Téa Leoni. Seriali u transmetua për një sezon dhe në kast kishte edhe emra të njohur si Lisa Kudrow, Peter Boyle, Andy Dick dhe Noah Emmerich.
Në vitet e fundit të jetës së tij, Parker ishte përqendruar kryesisht në punën si trajner aktrimi. Ai kontribuoi në këtë rol në projekte si seriali Ms. Marvel dhe Sun Records. Aktori vinte nga një familje artistësh. Nëna e tij, Rocky Parker, ishte aktore dhe regjisore e njohur për filmat In the Mood, Happy Together dhe Can’t Buy Me Love. Ajo më vonë u martua me aktorin Patrick Dempsey, pasi bashkëpunuan në një projekt filmik në vitin 1987. Rocky Parker ndërroi jetë në prill të vitit 2014.
