Konflikti i armatosur në Lindjen e Mesme është futur në ditën e 10-të. Presidenti i SHBA-së, Donald Trump, ka deklaruar se operacionet amerikane kundër Iranit mund të përfundojnë së shpejti.
Turqia , Emiratet e Bashkuara Arabe dhe Katari thonë se kanë kapur raketa iraniane, ndërsa Izraeli thotë se ka zbuluar më shumë sulme.
Përditësimet LIVE, 9 mars 2026
20:53 Tensionet në Lindjen e Mesme, Trump: Lufta me Iranin në thelb ka mbaruar, ata nuk kanë as anije…
Presidenti i Shteteve të Bashkuara, Donald Trump, deklaroi në një intervistë se ai beson se konflikti me Iranin është në një pikë të avancuar dhe se do të përfundojë së shpejti.
20:44 Trump dhe Putin në bisedë telefonike për rreth një orë, Kremlini: Presidenti rus propozoi zgjidhje për konfliktin në Iran
Presidenti amerikan Donald Trump dhe presidenti rus Vladimir Putin zhvilluan një telefonatë rreth një ore, gjatë së cilës diskutuan situatën në Iran dhe Ukrainë. Sipas Kremlinit, biseda ishte “një diskutim konstruktiv, shumë i sinqertë dhe profesional”.
20:14 Goditet njësia logjistike e lidhur me ambasadën e SHBA në Irak, dyshohet se sulmi u krye nga Irani
Një njësi logjistike e lidhur me Ambasadën e Shteteve të Bashkuara pranë aeroportit të Bagdadit në Irak është vënë në shënjestër të një sulmi iranian. Sipas raportimeve objektivi ishte kampi i mbështetjes logjistike që shërben për Ambasadën amerikane në Irak. Sulmi dyshohet të jetë kryer nga forca të lidhura me Iranin.
20:04 Më shumë se 300 fëmijë të vrarë që nga fillimi i luftës, organizata ndërkombëtare: Çdo orë, një jetë e humbur
Organizata humanitare “Save the Children” ka bërë të ditur se në dhjetë ditët që nga fillimi i sulmeve në Lindjen e Mesme janë vrarë gati 300 fëmijë në rajon, një shifër që sipas saj përkthehet në më shumë se një fëmijë të vrarë çdo orë.
19:38 Raketat mbi hapësirën ajrore turke, Erdogan paralajmëron Iranin: Përmbahuni nga hapat provokues
Presidenti i Turqisë, Erdogan, ka paralajmëruar Iranin që të shmangë çdo veprim provokues, pasi një raketë balistike e lëshuar nga Irani hyri në hapësirën ajrore të Turqisë.
18:36 Dita e dhjetë e konfliktit në Lindjen e Mesme, shkon në 1700 numri i viktimave
Jemi në ditën e dhjetë që kur Shtetet e Bashkuara dhe Izraeli nisën sulmet e para ndaj Iranit, duke shkaktuar kundërpërgjigje nga Teherani dhe duke përshkallëzuar ndjeshëm tensionet në Lindjen e Mesme.
17:25 “Duam një sinjal nga europianët”/ Rritja e çmimit të naftës, Putin: Jemi të gatshëm të bashkëpunojmë me ta për të stabilizuar tregun
Rusia është e gatshme të bashkëpunojë me vendet e Bashkimit Evropian për të garantuar furnizimet e nevojshme me naftë dhe gaz, me qëllim stabilizimin e tregjeve energjetike në situatën e jashtëzakonshme të shkaktuar nga lufta në Lindjen e Mesme.
17:08 “Trump na mashtroi dhe nuk e mbajti premtimin”, zyrtari i lartë iranian: Jemi përgatitur për një luftë të gjatë me SHBA, ajo mund të mbarojë vetëm nëse…
Një zyrtar i lartë iranian ka deklaruar se Irani është i përgatitur për një konflikt të gjatë me Shtetet e Bashkuara, duke paralajmëruar gjithashtu për mundësinë e vazhdimit të sulmeve ndaj vendeve të Gjirit për të ushtruar presion politik.
17:02 Ambasadori i Emirateve të Bashkuara Arabe në Gjenevë: Nuk do të marrim pjesë në asnjë sulm kundër Iranit
Ambasadori i Emirateve të Bashkuara Arabe në Gjenevë, Jamal Al-Musharakh, deklaroi se vendi i tij nuk do të marrë pjesë në asnjë sulm kundër Iranit nga territori i Emirateve.
16:46 Presidenti i Libanit bën thirrje për bisedime armëpushimi me Izraelin: Do çarmatosim Hezbollahun
Presidenti i Libanit, Joseph Aoun, ka bërë thirrje për negociata të drejtpërdrejta me Izraelin dhe për një armëpushim të menjëhershëm, me qëllim ndalimin e “të gjitha agresioneve tokësore, ajrore dhe detare izraelite kundër Libanit”, sipas një deklarate të publikuar të hënën nga presidenca libaneze.
16:34 Rrëzohet një raketë izraelite në jug të Libanit, katër të vdekur dhe tre të plagosur rëndë
Gazetari Artur Bibe i cili ndodhet në Liban, ka raportuar për rrëzimin e një rakete izraelite në një zonë në jug të vendit. Sipas tij kjo raketë la pas katër viktima dhe tre persona të tjerë të plagosur rëndë.
15:36 ‘Çmendet’ nafta, mbi 100 dollarë për fuçi, Trump: Çmim fare i vogël për paqen globale
Çmimi i naftës kapërceu për ta parën herë që nga pushtimi i Ukrainës në vitin 2022 nivelin e 100 dollarëve për fuçi, teksa lufta ne Lindjen e Mesme hyri në ditën e dhjetë.
14:36 Raketa e dytë mbi hapësirën ajërore të Turqisë, Ankaraja paralajmëron Iranin
Turqia reagoi pas raketës së dytë iraniane të kapur në hapësirën e saj ajrore. Ndërsa priste një reagim nga Presidenti Rexhep Tajip Erdogan, Ministri i Komunikacionit Burhanettin Duran foli në emër të qeverisë.
14:01 Pesë futbolliste iraniane shpëtohen nga policia pasi ikën nga skuadra, largohen nga hoteli i ekipit në Australi
Mes frikës për sigurinë e tyre, pesë anëtare të skuadrës iraniane të futbollit të femrave janë larguar nga hoteli i ekipit në Australi dhe aktualisht janë të sigurta me policinë, tha një burim për CNN Sports.
13:38 Konflikti në Lindjen e Mesme, Parlamenti vendos shtyrjen e zgjedhjeve parlamentare në Liban
Parlamenti i Libanit njoftoi se po e zgjat mandatin e tij me dy vjet dhe po shtyn zgjedhjet parlamentare për shkak të luftës së vendit me Izraelin dhe Hezbollahun.
13:33 SHBA evakuon konsullatën e saj në Turqinë jugore, i kërkon stafit diplomatik të largohet
Shtetet e Bashkuara kanë pezulluar shërbimet e tyre konsullore në Turqinë jugore dhe i kanë kërkuar stafit të tyre diplomatik jo-thelbësor të largohet nga zona “për shkak të rreziqeve të sigurisë”, njoftoi sot Departamenti i Shtetit.
13:29 Shtetet anëtare të BE-së kanë rezerva nafte deri në 90 ditë, G7 takohet urgjentisht për të liruar 400 milionë fuçi
Bashkimi Evropian ka rezerva të mjaftueshme nafte për të përballuar një krizë të mundshme energjetike, ndërsa tensionet në Lindjen e Mesme vazhdojnë të rrisin pasigurinë në tregjet globale të energjisë.
13:25 Për herë të dytë, NATO shkatërron një tjetër raketë iraniane në hapësirën ajrore të Turqisë
Një raketë balistike e lëshuar nga Irani është shkatërruar në hapësirën ajrore turke, sipas ministrisë turke të Mbrojtjes.
Raketa u shkatërrua nga mbrojtjet e NATO-s me bazë në Mesdheun lindor, thuhet në deklaratë, duke shtuar se fragmente municionesh ranë në fusha të zbrazëta në Gaziantep, në Turqinë juglindore.
12:45 Shpërndanë video, foto dhe informacione false gjatë luftës, Katari arreston 313 persona
Autoritetet e Katarit kanë arrestuar më shumë se 300 persona për publikimin e imazheve dhe “informacioneve false” gjatë sulmeve të Iranit ndaj shtetit të Gjirit, tha të martën ministria e brendshme e Katarit.
12:21 Putin përgëzon djalin e Khameneit pas zgjedhjes si lider i ri suprem i Iranit: Jam i bindur që do ta mbash me nder trashëgiminë e babait tënd
Presidenti rus Vladimir Putin i ka shkruar Mojtaba Khameneit, për ta përgëzuar për marrjen zyrtarisht të detyrës si lider i ri Suprem i Iranit, sipas Kremlinit.
“Në një kohë kur Irani po përballet me agresion të armatosur, qëndrimi juaj në këtë pozicion të lartë padyshim kërkon guxim dhe përkushtim të madh. Jemi të bindur se ju do ta mbani me nder trashëgiminë e babait tuaj dhe do ta bashkoni popullin iranian përballë sprovave të rënda”, shkroi presidenti.