Situata politike në Tiranë është tensionuar, ndërsa Kuvendi pritet të marrë sot një vendim të rëndësishëm lidhur me çështjen që përfshin zv/kryeministren Belinda Balluku. Në prag të këtij vendimi ka reaguar edhe Ambasada Britanike në Tiranë, e cila përmes një deklarate publike ka dërguar një mesazh të drejtpërdrejtë për rëndësinë e sundimit të ligjit dhe pavarësisë së drejtësisë.
Në një reagim të publikuar në rrjetet sociale, ambasada britanike thekson se proceset demokratike duhet të mbrohen, por paralajmëron se imuniteti parlamentar nuk mund të përdoret si mburojë për të shmangur përgjegjësinë para ligjit.
Sipas deklaratës, Mbretëria e Bashkuar vlerëson progresin që Shqipëria ka bërë në reformën në drejtësi që nga viti 2016, veçanërisht me krijimin e strukturave të posaçme kundër korrupsionit dhe krimit të organizuar, si SPAK.
Megjithatë, në mesazhin e saj, Ambasada Britanike nënvizon se ruajtja e këtij progresi kërkon bashkëpunim dhe respekt të ndërsjellë mes tre pushteteve të shtetit.
“Ambasada Britanike thekson rëndësinë e ruajtjes së sundimit të ligjit dhe pavarësisë gjyqësore dhe njeh progresin e Shqipërisë në reformën në drejtësi që nga viti 2016, përfshirë krijimin e SPAK-ut.
Ekzekutivi, Gjyqësori dhe Legjislativi mbeten partnerë të barabartë në mbështetjen e këtij progresi si pjesë e qëllimit të Shqipërisë për anëtarësim në Bashkimin Europian.
Ndërsa imuniteti parlamentar duhet të mbrojë proceset demokratike, ai nuk duhet të shndërrohet në pengesë për llogaridhënie të barabartë para ligjit”, thuhet në deklaratën e ambasadës.
Reagimi vjen në një moment delikat për politikën shqiptare, ndërsa pritet që Kuvendi të shprehet për çështjen që lidhet me Belinda Ballukun, një vendim që po ndiqet me vëmendje si nga politika vendase, ashtu edhe nga partnerët ndërkombëtarë.
Mesazhi i Londrës interpretohet si një thirrje e fortë për respektimin e standardeve të shtetit të së drejtës, në një kohë kur Shqipëria synon të avancojë më tej në procesin e integrimit europian.
Comments are closed.