Një reagim i fortë ka ardhur nga ish-deputeti i Partisë Socialiste, Petro Koçi, i cili ka kritikuar qëndrimin e deputetëve socialistë lidhur me vendimin për të mos lejuar heqjen e imunitetit të Belinda Ballukut dhe për ta lënë çështjen e saj në duart e drejtësisë.
Përmes një reagimi në rrjetet sociale, Koçi u shpreh se refuzimi i kërkesës së SPAK për të lejuar një masë më të rëndë sigurie ndaj ish-zëvendëskryeministres përbën një hap pas për sundimin e ligjit në Shqipëri.
“Nuk është fundi i botës dhe as kohë e dielltë për opozitën berishiane, por vendimi i sotëm i refuzimit të kërkesës së SPAK për lejen e Kuvendit për masë sigurimi ndaj një deputeteje nën ndjekje penale përbën një hap prapa për procesin politik dhe sundimin e ligjit në Shqipëri”, shkruan Koçi.
Ai thekson se shqetësimi i disa socialistëve për përdorimin e shpeshtë të masave të rënda të sigurisë nuk mund të zgjidhet përmes mbrojtjes së një rasti individual, si ai i Ballukut, por duhet trajtuar përmes reformave ligjore dhe konsultimit me praktikat më të mira ndërkombëtare.
Sipas tij, çdo ndërhyrje selektive e politikës për të mbrojtur individë të caktuar nga ndjekja penale rrezikon të dëmtojë besimin publik tek drejtësia.
“Ndërhyrja selektive e politikës së ditës në mbrojtje të individëve të caktuar të saj ndaj ndjekjes penale, opozita në rastin Berisha apo maxhoranca në rastin Balluku, e kompromenton angazhimin publik dhe parimor të klasës politike për të respektuar drejtësinë e re në luftën ndaj korrupsionit dhe krimit të organizuar”, përfundon reagimin e tij ish-deputeti socialist.
Comments are closed.