Ambasadorët e BE-së të ndarë për deklaratën ndaj qeverisë shqiptare, ndërsa përplasja me Gjermaninë thellohet mbi drejtësinë dhe integrimin europian…
Ambasadorët e vendeve të Bashkimit Europian nuk kanë arritur të mblidhen të gjithë për të marrë një vendim të përbashkët, për një qëndrim politik ndaj mazhorancës së Edi Ramës.
Siç mësohet, ambasadorët e Italisë, Hungarisë, Polonisë dhe disa vendeve të Europës Qendrore nuk i janë përgjigjur ftesës së Berlinit për të miratuar një deklaratë të përbashkët ndëshkuese.
Megjithatë, takimi që është mbajtur në selinë e BE-së u zhvillua me dyer të mbyllura dhe, siç mësohet, ambasadorët i kanë kërkuar Këshillit Politik, përkatësisht ministrave apo krerëve të shtetit, të marrin një vendim jashtë logjikës së Komisionit, pasi sipas tyre Tirana zyrtare po ecën jashtë vijës politike të standardeve të BE-së.
Ambasadorët kanë deklaruar se mazhoranca ka jo vetëm një qëndrim, por një vijë politike për të vendosur pengesa në rrugën e drejtësisë, që sipas tyre përbën bllokim për luftën kundër korrupsionit.
Siç mësohet, mbledhja është thirrur nga ambasadorët e Gjermanisë dhe Suedisë, por në të ka pasur “mungesa të rëndësishme”, që sipas burimeve lidhen me lobimin e Edi Ramës, megjithatë përplasja me Berlinin mund të vijojë edhe më tej.
Në konferencën e djeshme për shtyp, Rama akuzoi qeverinë gjermane se e ka kthyer kancelarinë e saj në një opozitë të “molotovëve të Tiranës”.
Ndërkaq, përplasja e Ramës me Gjermaninë duket se është e fortë dhe nuk lidhet vetëm me çështjen e SPAK-ut, por edhe me ritmin e lëvizjeve që mund ta fusin Shqipërinë në BE së bashku me Malin e Zi.
Tashmë Berlini e do Tiranën jashtë çiftit me Podgoricën dhe kjo çështje ka sjellë përplasjen e madhe.
Siç mësohet, Gjermania ka kërkuar gjithashtu ndalimin e miratimit me procedurë të përshpejtuar të ligjeve të integrimit nga Parlamenti shqiptar.
Për këtë janë riaktivizuar edhe një grup organizatash që financohen nga mekanizma mbështetës të lidhur me Gjermaninë.
Këto organizata kanë shprehur shqetësim për projektvendimin e paraqitur më 2 mars 2026 për ndryshime në Rregulloren e Kuvendit të Republikës së Shqipërisë, i cili parashikon përdorimin e një procedure të përshpejtuar për legjislacionin që lidhet me procesin e integrimit europian.
“Efikasiteti i procesit legjislativ duhet të shoqërohet me standarde të larta transparence, përfshirjeje publike dhe debat parlamentar”, thuhej në deklaratën e organizatave, të shpërndarë për mediat paraditen e 13 marsit.
Organizatat theksojnë se në procesin e integrimit europian rëndësi ka jo vetëm ritmi i përafrimit të legjislacionit, por edhe cilësia e procesit dhe përfshirja e aktorëve të interesit.
“Korniza e monitorimit të Komisionit Europian vlerëson jo vetëm ritmin e përafrimit të legjislacionit, por edhe cilësinë dhe përfshirjen e grupeve të interesit si pjesë e funksionimit të institucioneve demokratike”, theksuan organizatat.
Në deklaratë ngrihen dy shqetësime kryesore që lidhen me projektvendimin për ndryshime në Rregulloren e Kuvendit. Sipas organizatave, përdorimi i procedurës së përshpejtuar për legjislacionin e integrimit europian dhe mungesa e garancive të qarta për transparencë dhe konsultim publik mund të ndikojnë në cilësinë e procesit legjislativ.
Në listën e organizatave që kanë firmosur këtë nismë janë disa nga ato që më parë kanë qenë pjesë e listave të financimit të USAID dhe fondacioneve ndërkombëtare, të cilat u bllokuan pas ndryshimeve politike në SHBA.
Megjithatë, thelbi qëndron diku tjetër: përplasja me Edi Ramën po kthehet në një lëvizje më të gjerë politike, e cila pavarësisht kundërshtive nuk pritet të ndalet.
Kjo do të thotë se mandati i katërt i Ramës, të paktën në këndvështrimin e fuqisë më të madhe europiane, ka hyrë në një fazë të vështirë./Pamfleti
Sekretet e mbledhjes në BE për të ndëshkuar Ramën; kush e braktisi mbledhjen? Ditët e ZEZA që e presin
Comments are closed.