Çmimi i naftës në tregjet ndërkombëtare ka kaluar kufirin e 100 dollarëve për fuçi, ndërsa në tregun shqiptar një litër naftë po shitet rreth 193 lekë.
Pas rritjes së fortë në mesjavë, kur çmimi në pikat e karburantit arriti deri në 210 lekë për litër, në ditët e fundit është regjistruar një ulje. Aktualisht shumica e pikave të shitjes e ofrojnë naftën rreth 193 lekë për litër.
Megjithatë, në krahasim me periudhën para përshkallëzimit të konfliktit në Lindjen e Mesme, karburanti në vend mbetet më i shtrenjtë. Çmimi për litër është rreth 20 lekë më i lartë se më parë.
Në bursë, nafta bruto ka shënuar rritje të shpejtë brenda pak ditësh. Nga rreth 87 dollarë për fuçi në mesjavë, çmimi ka kaluar mbi 100 dollarë për fuçi.
Autoritetet kanë ngritur një task-forcë për të monitoruar tregun dhe për të shmangur abuzimet me çmimet në pikat e karburantit.
Nëse tensionet në rajon vazhdojnë dhe çmimi i naftës rritet më tej, kjo mund të ndikojë edhe në sektorë të tjerë të ekonomisë. Rritja e karburantit zakonisht reflektohet në koston e transportit, energjisë elektrike dhe në çmimet e produkteve bazë të konsumit.
Comments are closed.