Edi Rama ka paralajmëruar dje në mbledhjen e grupit parlamentar të PS deputetët dhe ministrat se nëse PS nuk gjen forcën për të kapërcyer këtë situatë dhe hendekun e krijuar mes strukturave dhe qytetarëve, rrezikon shpërbërjen për të mos gjetur forcën e ribashkimit.
“Dua t’ju kujtoj të gjithëve se duhet të mbetemi të angazhuar dhe të përkushtuar me qytetarët, me votuesit. Nëse nuk do të gjejmë forcën të kapërcejmë këtë situatë, gjithçka mund të ndodhë në shpërbërjen e kësaj partie në disa copa, në disa fraksione”, ishte paralajmërimi i kryesocialistit për të vënë në baza pune të gjithë socialistët për tu bashkuar mes vetes por edhe me bazën.
Deklarata erdhi pas zhvillimeve në mbledhjen e grupit parlamentar, ku që nga ora 11 e ditës së djeshme, deri në orën 5 të pasdites, Edi Rama mbajti të mbledhur në një forum të zgjeruar deputetët, ministrat dhe disa prej drejtorëve më të rëndësishëm të qeverisë, ku raportimi kryesor ishte ai i drejtoreshës së Kadastrës që u përball me shqetësimet e dhjetëra deputetëve për mënyrën sesi po funskionon kjo strukturë dhe problematikave që u ka shkaktuar qytetarëve.
Deklarata e Edi Ramës vjen pas disa zhvillimeve në PS që nga momenti i votimit në kuvend për moslejimin e kërkesës së prokurorisë së posaçme për dhënien e autorizimit për arrestimin e Belinda Ballukut në 12 mars. Në atë votim, nuk morën pjesë dy deputetë, Elisa Spiropali dhe Fatmir Xhafaj.
Ky i fundit u pyet edhe në mbledhjen e djeshme për mungesën në atë seancë por argumentoi që për arsye personale (një operacion i bashkëshortes) nuk i mundësoi prezencën, me Edi Ramën që hodhi romuze se këtë procedurë mund ta shtynte për një kohë tjetër.
Ndërsa marrëdhëniet me Elisa Spiropalin nuk janë në fazën e tyre më të mirë, siç kanë qenë më parë. Elisa Spiropali nuk mori pjesë në atë seancë pa pasur një arsye, dhe ditën e djeshme, konfliktet mes saj dhe Ramës ishin të dukshme dhe u bënë publike.
Taulant Balla pak ditë më parë paralajmëroi se qëndrimi i zonjës Spiropali do të analizohej në mbledhjen e grupit dhe nuk vonoi edhe përgjigja e kësaj të fundit që do të donte që problemet të diskutoheshin hapur në grupin parlamentar.
Mbledhja e grupit parlamentar u zhvillua dje, nuk pati ndonjë qëndrim për veprimin e Spiropalit ndaj vendimit politik të PS, por në planin politik, zonja Spiropali u mënjanua nga strukturat që kishte në ndjekje, ku kryesori ishte ai i drejtimit politik të qarkut të Tiranës.
Comments are closed.