Një dasmë që duhej të ishte dita më e lumtur e jetës së një çifti në Turqi, u kthye në një tragjedi të vërtetë. Një 23-vjeçar u qëllua aksidentalisht për vdekje gjatë ceremonisë martesore në një fshat të provincës veriore të Giresunit. Sipas raportimeve nga mediat vendase, i riu, që sapo kishte kurorëzuar dashurinë e tij, ndërroi jetë një ditë pas dasmës si pasojë e plagëve të marra nga arma e zjarrit.
Hetimet paraprake zbuluan se shkaktar i incidentit ishte një e afërme nga ana e dhëndrit, e cila në shenjë festimi hapi zjarr me armë. Të shtënat, që ishin menduar si pjesë e gëzimit, rezultuan fatale duke e goditur pikërisht dhëndrin. Policia ka ndërhyrë menjëherë dhe ka arrestuar autoren e dyshuar të tragjedisë, e cila pritet të përballet me akuzat për shkaktim të vdekjes së të afërmit të saj.
Ngjarja ka sjellë një valë reagimesh në opinionin publik turk, pasi nuk është rasti i parë i këtij lloji. Aksidentet nga armët e zjarrit gjatë festimeve janë kthyer në një fenomen të zakonshëm në vend, ku sipas të dhënave të një fondacioni vendas, qarkullojnë mbi 40 milionë armë, shumica e të cilave mbahen në mënyrë të paligjshme. Ky realitet ka bërë që gëzimet shpesh të shndërrohen në skena tragjike, ku humben jetë njerëzish të pafajshëm.
Vetëm pak ditë më parë, një incident i ngjashëm u regjistrua në provincën fqinje të Trabzonit, ku një person u vra dhe dy të tjerë mbetën të plagosur gjatë një tjetër dasme. Raste të tilla, që përsëriten çdo vit, kanë nxitur thirrje të shumta për ndalimin e qitjeve festive dhe rritjen e masave të sigurisë, por duket se tradita e përdorimit të armëve në ceremoni ende mbetet e përhapur.
Për familjen e 23-vjeçarit nga Giresuni, festa e dasmës së shumëpritur u kthye në ditë zie. Komuniteti lokal ka mbetur i tronditur, ndërsa autoritetet janë zotuar se do të ndërmarrin hetime të plota për të ndaluar përsëritjen e tragjedive të ngjashme.
Comments are closed.