Eliot Engel, ish-kongresmeni i Nju Jorkut nga Bronksi, vdiq të premten, tha familja e tij sot (10 prill) në një deklaratë. Mbështetësi i madh i shqiptarëve dhe avokati i zjarrtë i Kosovës mbylli sytë në moshën 79 vjeç.
Demokrati përfaqësoi pjesë të Qarkut Westchester dhe veriun e Bronx-it gjatë 16 mandateve në Dhomën e Përfaqësuesve nga viti 1989 deri në vitin 2021.
“Gjatë më shumë se 44 viteve të tij në shërbim publik, Eliot Engel luftoi pa u lodhur për zgjedhësit e tij në vend dhe për paqen dhe sigurinë në mbarë botën. Ne e duam dhe na mungon shumë”, tha familja.
Engel u zgjodh për herë të parë në vitin 1988. Ai u mund në zgjedhjet paraprake demokrate të vitit 2020 nga Jamaal Bowman, fituesi përfundimtar në zgjedhjet e përgjithshme të atij viti, informon CBS News.
Engel shërbeu si anëtar i lartë dhe kryetar i Komitetit të Punëve të Jashtme të Dhomës së Përfaqësuesve në vitet e fundit të mandatit të tij.
“Gjatë gjithë karrierës së tij, kongresmeni Engel ishte një avokat i zjarrtë i zgjedhësve të tij në Westchester dhe Bronx. Ai ishte një kampion i të drejtave të njeriut dhe … ndihmoi në formësimin e politikës amerikane në skenën globale”, tha në një deklaratë ekzekutivi i Qarkut Westchester, Ken Jenkins. “Trashëgimia e tij është një trashëgimi angazhimi, bindjeje dhe shërbimi.”
Përfaqësuesi amerikan Ritchie Torres tha se Engel “ishte një gjigant i politikës së Nju Jorkut dhe një nga kampionët më të mëdhenj që Bronksi ka pasur ndonjëherë në Kongres”, në një deklaratë në mediat sociale .
“Ai shërbeu për më shumë se tre dekada me përkushtim të palëkundur, duke luftuar për zgjedhësit e tij dhe duke u ngritur në këmbë për demokracinë në të gjithë botën”, tha Torres. “Ai ishte një pionier për Bronxin në Uashington dhe një avokat i zjarrtë për Kosovën dhe komunitetin shqiptar në një kohë kur pak të tjerë po i kushtonin vëmendje. Ngushëllimet e mia më të thella shkojnë për familjen e tij dhe të gjithë ata që e donin.”
Engel ishte anëtar i Asamblesë së Shtetit të Nju Jorkut për më shumë se 10 vjet përpara se të bëhej kongresmen.
Comments are closed.