Partia Demokratike pritet të hyjë në një proces përzgjedhjeje për kandidatët në zgjedhjet vendore, ndërsa emri i Ilir Alimehmetit po përmendet si një nga alternativat për Bashkinë e Tiranës.
Eda Grimci, kryetare e degës së PD në Njësinë 9, e cilësoi Alimehmetin si një nga emrat potencialë për këtë garë.
“Ilir Alimehmeti është një nga kandidaturat e shkëlqyera me të cilat mund të dalë PD-ja. Ky proces, të paktën me sa di unë, do të kalojë përmes primareve. Është një nga kandidaturat, nuk është e vetmja”, u shpreh ajo për “A2 CNN”.
Sipas Grimcit, Alimehmeti ka shprehur gatishmërinë për të kandiduar, por theksoi se ende nuk ka një vendim zyrtar nga partia.
“Partia Demokratike nuk ka asnjë kandidaturë zyrtare. Kandidaturat vijnë në forumet e larta drejtuese, ka një komision që merret me kandidaturat e shpallura apo të vetëshpallura”, shtoi ajo.
Ajo theksoi se procesi i përzgjedhjes do të vijë pas riorganizimit të strukturave të partisë, ndërsa nënvizoi rëndësinë e një kandidature të gjerë përfaqësuese.
“Sot diskutohet vetëm një gjë: më e mira do të ishte një kandidaturë përbashkuese, që përmbledh shumë grupe interesi, politik dhe jo vetëm”, deklaroi Grimci.
Comments are closed.