Ndërkohë pas më shumë se një dekade, dhimbja në zemrën e nënës së tij, Kozeta Mamaqit vijon të jetë e njëjtë si ditën e parë kur mori vesh lajmin më të hidhur të jetës.
Ajo ka qenë e ftuar në Podcastin “Pa Komplekse”, ku ka ndarë disa momente para se Olldashi të largohej nga banesa, duke u shprehur se ende nuk e beson dot që e ka humbur përgjithnjë të birin.
“Ishte e tmerrshme, e përcolla te dera të ditë, e përcolla isha me djalin e vogël, atij i dha ca detyra për të bërë edhe mua më dha atë të puthurën e zakonshme të përhershme që më jepte në ballë, sa herë ikte sa herë vinte më puthte në ballë.
Edhe iku dhe s’erdhi më. Iku dhe s’erdhi më, nuk… nuk… nuk mund ta besoj edhe sot si ka mundësi?! Si ka mundësi ishte ora 6 e pasdites kur iku, nuk e di” shprehet me zërin që i dridhet Kozeta.
Teksa më tej mes lotësh ka thënë se për dy vite e gjysmë nuk ka dalë nga shtëpia dhe ka treguar se kishte nisur një libër me tregimë por pas vdekjes të së birit nuk ka patur më kurrë vullnetin ta hapë dhe të shkruajë.
“Ishte një tmerr, 2 vjet e gjysmë nuk kam dalë nga shtëpia, 2 vjet e gjysmë nuk dola nga pragu i shtëpisë. Kisha një libër me tregime në kompjuter, ka mbetur aty siç ka qenë, sepse mua më është tharë shpirti, unë nuk kam, nuk kam motiv, nuk kam motiv nuk kam motiv…” thotë ajo mes lotësh.
Kush ishte Sokol Olldashi?
Sokol Olldashi është spikatur si një prej figurave më të dalluara të Partisë Demokratike.
Ai ka qenë një ndër studentët e ngjarjeve të Dhjetorit ’90 dhe katër herë deputet në Kuvendin e Shqipërisë.
Ai e nisi karrierën e tij si gazetar dhe kreyeredaktor i gazetës ‘Albania’.
Ndërsa në vitin 2001 zgjidhet për herë të parë deputet në Kuvendin e Shqipërisë.
Katër vite më vonë, Olldashi rizgjidhet në Kuvend, me fitoren në Shijak.
Pasi fitoi mandatin e dytë të deputetit ai u emërua në krye të Ministrisë së Brendshme, post të cilin e mbajti nga viti 2005 deri në fillim të vitit 2007.
Në këtë kohë kandidoi për kryetar të Bashkisë së Tiranës, garë që ai e humbi përballë Edi Ramës. Më pas, Sokol Olldashi merr postin e ministrit të Transporteve dhe Punëve Publike deri në shtator të 2013. Pas humbjes së Partisë Demokratike më 23 qershor dhe dorëheqjes së Sali Berishës, Olldashi kandidoi për postin e kryetarit të PD, përballë Lulzim Bashës.
Në aspektin personal, ai ishte i martuar me Enkeleda Olldashi dhe kanë dy djem, Glaukun dhe Kleitin. Kohët e fundit, djali i madh Glauku ka filluar të aktivizohet me Partinë Demokratike, duke qenë pjesëmarrës në protesta të ndryshme.