E bujshme, shqiptari që rrezikon ekstradimin dhe i shpëtoi atentatit me 30 plumba plas “bombën” në gjykatën në Londër, zbulon si një grup vrasësish në Shqipëri kryenin vrasje për llogari të kryeministrit dhe ministrit të Brendshëm
Një personazh i njohur i botës së krimit në Berat, Irfan Azizi, i njohur ndryshe si “Fania”,
po përpiqet të bllokojë ekstradimin e tij nga Britania e Madhe drejt Shqipërisë, duke pretenduar se kthimi në vendlindje do t’i rrezikonte jetën. Ai doli para Gjykatës së Magjistraturës në Westminster, ku kundërshtoi kërkesën për ekstradim, duke deklaruar se sapo të prekë tokën shqiptare ai mund të bjerë pre e një atentati të dytë, që sipas tij mbrapa do të qëndrojë një nga kriminelët më të përfolur në vendin tonë, pikërisht Talo Çela.
Gjatë seancës dëgjimore, 36-vjeçari rrëfeu se i shpëtoi për mrekulli një atentati të ndodhur më 29 nëntor 2020, kur u qëllua me rreth 30 plumba nga një person i armatosur me kallashnikov pranë një karburanti. “Ata filluan të më qëllonin, rreth 30 plumba. Një plumb më goditi dorën, e cila më copëtoi në 13 vende”, deklaroi Azizi para gjykatës britanike, duke përshkruar momentet dramatike të sulmit që, sipas tij, e detyroi të largohej nga Shqipëria.
Sipas dëshmisë së tij, grupi kriminal që organizoi atentatin është tepër i fuqishëm dhe i lidhur me struktura të larta, duke pretenduar madje se “kryejnë vrasje për Kryeministrin dhe Ministrin e Brendshëm”. Ai shtoi se nuk ka pasur paralajmërime të mëparshme, pasi “ata nuk paralajmërojnë kur do të të vrasin, thjesht vijnë për ty”, raporton “Daily Mail”.
E shkuara kriminale në Shqipëri
Irfan Azizi është skeduar nga Policia shqiptare dhe autoritetet e zbatimit të ligjit si një person i përfshirë në veprimtari të paligjshme në fushën e vjedhjeve, kryesisht të automjeteve. Në vitin 2018, Ermir Azizi dhe vëllai i tij Fania, janë ndaluar nga Policia e Fierit për vjedhjen e një Mercedesi. Nga kontrolli ushtruar në pikën e varrezave të automjeteve të quajtur “Azizi” në fshatin Poshnje, Berat, në pronësi të shtetasve Irfan dhe Ermir Azizi, është gjetur dhe sekuestruar Mercedesi i vjedhur nga dy vëllezërit në Lushnje, të cilin e kishin çmontuar me qëllim shitjen e tij për pjesë këmbimi.
Atëkohë, Irfan i ishte 28 vjeç dhe ishte dënuar më parë për vjedhje, si dhe i proceduar për lojëra fati, kurse i vëllai Ermiri ishte 26 vjeç dhe ishte dënuar për mbajtje pa leje të armëve. Gjykata e Magjistraturës në Ëestminster dëgjoi sesi Fania ia kishte hedhur drejtësisë, duke deklaruar se kishte paguar para te një gjyqtar.
Shqiptari që rrezikon të dëbohet nga Anglia ka pretenduar se para se të binte në atentat dhe të largohej drejt ishullit, ka qenë një “biznesmen i pasur” në Shqipëri, me tre pika karburanti, si dhe lavazhe makinash dhe një bar-kafe. Atentati ndaj tij ndodhi më 29 nëntor 2020, kur nga një automjet që ndaloi jashtë një karburanti doli një person i armatosur me kallashnikov dhe filloi të qëllonte me breshëri. Irfan Azizi u plagos në dorë dhe pesë javë më pas, u largua nga Shqipëria. Organizatori i atentatit është raportuar gjerësisht në mediat shqiptare si Talo Çela, një ish-mik i ngushtë i Azizit, i cili aktualisht është një nga kriminelët më të kërkuar në Shqipëri.
Pse Talo Çela e donte të vdekur
Figura e Irfan Azizit është raportuar për krime të rëndomta. Raportime të mëhershme, që datojnë që nga gushti i vitit 2018 dhe shtatori i vitit 2021, e përshkruajnë atë si një person që merrej kryesisht me vjedhje automjetesh. Mes klientëve të tij të përhershëm në shitblerjen e automjeteve të vjedhura ishte edhe Talo Çela, vrasës me pagesë që sipas përgjimeve të Sky Ecc përdorej nga vëllezërit Çopja, me qendër në Dubai për eleminimin e kundërshtarëve në trafikun e drogës.
Por në nëntor të vitit 2020, Irfan Azizi i shpëton për mrekulli një atentati. Ai goditet me një plumb në dorë pasi armët e autorëve bllokohen. Përgjimet e SKY ECCC tregojnë se autor ishte pikërisht Talo Çela. Vrasësi me pagesë Talo Çela dyshonte se Azizi u kishte shitur bandave rivale një makinë që u përdor për të eleminuar vëllain e tij Bujar Çela. Përgjimet e Sky ECC zbulojnë se për dy javë rresht Talo Çela kishte shkuar thuajse çdo ditë në Berat, për të vëzhguar lëvizjet e Irfan Hazizit dhe për të organizuar atentatin e nëntorit të vitit 2020, kur ai u qëllua me armë në Berat nga një mjet në lëvizje.
Nga bisedat e zbardhura të aplikacionit SKY ECC, Talo Çela shfaqet si koordinatori kryesor i atentatit duke dhënë udhëzime për eliminimin e Irfan Azizit. Në një prej komunikimeve, ai i shkruan bashkëpuntorëve: “Duhet me e gjet patjetër, s’ka ku shkon”, duke kërkuar me insistim gjetjen e Azizit. Në një tjetër mesazh kërkon me insistim: “Mos e lini me na ik prapë, mbarojeni punën”. Duhet thënë se Irfan Azizi dhe Talo Çela kishin qenë miq. Madje edhe kishin marrë pjesë në grabitje. Vetëm se rrugët e tyre ishin ndarë dhe Azizi e pa veten si shënjestër të grupit kriminal