BKH pritet të operojë si një njësi e veçantë, ku të kryejë operacione dhe të kryejë analiza inteligjente…
Klodian Braho pritet të sjellë një ndryshim rrënjësor në radhët e Byrosë Kombëtare të Hetimit. Duke qenë se shumë operacione dekonspirohen, plani i kreut të ri të SPAK është që brenda BKH-së të krijohen dy njësi, duke “zëvendësuar” Shërbimin Informativ dhe Policinë e Shtetit.
Kur prezantoi platformën e tij në KLP, Klodian Braho deklaroi: “Kam vlerësuar që Prokuroria e Posaçme ka nevojë për krijimin e një sektori të veçantë për analizën e informacionit. Ky sektor duhet të kryejë analiza kriminale, të shërbejë për matjen e riskut, si edhe të shërbejë për prodhimin e raporteve periodike. Ngritja e sektorit të analizës është një hap i domosdoshëm”.
Kjo platformë e tij duket se do të bëhet realitet. Në raportin vjetor të SPAK për vitin që lamë pas janë hedhur edhe piketat e këtij plani. Pra synohet të krijohet një “Njësi analize”, me pak fjalë një lloj “shërbimi inteligjent”, si dhe një “Njësi operacionale”, e cila do të merret me arrestimet.
“Duke mbajtur parasysh kapacitetet aktuale hetimore të Byrosë, vlerësohet nevoja për ngritjen dhe zhvillimin e disa funksioneve të brendshme themelore, të tilla si analiza kriminale, forca operacionale dhe përdorimi i metodave speciale të hetimit, me qëllim garantimin e pavarësisë për funksione operative dhe teknike nga institucione si Policia e Shtetit”, thekson SPAK.
Njësia e analizës kriminale do të sigurojë një informacion të bollshëm mbi tendencat e krimit, do të zhvillojë vlerësime të kërcënimeve dhe rrezikut potencial për veprat penale në juridiksion të SPAK, si edhe do të ndihmojë në nxitjen e marrëdhënieve më të thelluara dhe ndërveprimin me agjencitë e tjera të zbatimit të ligjit.
Ndërkohë, ngritja e forcës operacionale nëpërmjet kapaciteteve të specializuara si vëzhgimi, depërtimi, fshehja, përgjimi etj., është vendimtare për zhvillimin e hetimeve të SPAK, duke pasur parasysh kapacitetet dhe burimet e kufizuara të BKH-së në këtë drejtim, thekson SPAK.
“Ngritja e një njësie të tillë brenda strukturës do të kufizojë maksimalisht edhe mundësinë e rrjedhjes së informacioneve në ekzekutimin e kryerjes së veprimeve hetimore, si edhe do të zhvillojë në një dimension tjetër zhvillimin e kapaciteteve hetimore, nëpërmjet përdorimit të metodave speciale të hetimit dhe krijimit të njohurive të avancuara teknologjike për përdorimin e pajisjeve të sofistikuara në funksion të kërkimit të provës”, thuhet në planin e SPAK.
Përveç kësaj, BKH është modernizuar me dhoma për marrjen në pyetje, ku gjithçka do të regjistrohet. Po ashtu do të ketë dhoma për njohje fytyre, pra njësoj si në filma ku një “X” dëshmitar qëndron pas xhamit dhe verifikon të akuzuarin.
Këto lëvizje vijnë në një kohë kur SPAK ankohet se bashkëpunimi me policinë ka rënë, ndërkohë që në shumë raste ka pasur akuza për dekonspirime. Po ashtu, prej kohësh flitet se raportet mes SHISH dhe SPAK janë ftohur ndjeshëm. Me pak fjalë, plani është që BKH të veprojë e vetme, pa ndihmë nga jashtë. /Pamfleti
Comments are closed.