Politikën që po bën Partia Demokratike, Grida Duma e ftuar në emisionin “Breaking” në Top News e ka quajtur të vjetruar, është pikërisht kjo mënyrë e të bërit politikë që po pengon rivalitetin e shëndetshëm dhe zhvillimin.
Duma thotë se Berisha ka pranuar një gabim (me Bashën), por sot nuk po reflekton. Ai është i mbyllur në zakonet e tij politike dhe i përsërit ato. Ajo thekson se që nga vitet ’92-’93, Berisha nuk ka pasur një rival të vërtetë brenda PD-së që ta sfidonte seriozisht. Kjo e ka bërë të ndihet i pathyeshëm dhe i pazëvendësueshëm.
Grida Duma e përshkruan Berishën si dikë që e sheh PD-në si krijesën e tij, jo si pronë, por gjithsesi si diçka që nuk mund të rivalizohet nga të tjerët. Ajo thotë se aksionerët e tjerë në PD kanë qenë më shumë të frikësuar prej tij sesa e kanë dashur. Kjo ka krijuar një raport të pabalancuar.
Megjithatë, Berisha ka pasur aftësinë të mbledhë njerëz edhe kur ata i kishin dalë kundër, si në vitin 2005. Pra, ka pasur instinkt politik për të konsoliduar partinë.
“Unë mendoj se këtë herë Sali Berisha nuk duhej të kishte gabuar. Dhe që Berisha gabon, ju thashë që në fillim: e ka pohuar vetë, u ka thënë demokratëve pasi u rikthye pas 2013-s. Por sot nuk po reflekton. Nuk po reflekton sepse ka një ligjësi në jetë dhe në politikë: kur je mësuar me disa reflekse, zakone, ti i përsërit po të njëjtat.
Gjatë kryesimit të PD-së nga Berisha, nuk ka pasur ndonjëherë dikë që pas viteve ’92-’93 ta rivalizonte vërtet, që Berisha të ndjente se kishte përballë një rival konkret, të fuqishëm. Kjo gjë i është kthyer në lëkurë, në stil, në mënyrë jetese dhe në mendësi: Unë jam i pathyeshëm aty. Kur dua të kthehem, kthehem. Është partia ime, është krijesa ime.
Por ai e di gjithashtu që aksionerët e tjerë kanë qenë shumë më të vegjël se ai. Ai e di që aksionerët e tjerë në PD, që nga ’92-’93 e këtej, janë frikësuar prej tij më shumë sesa e kanë dashur. Megjithatë, ka ditur që në momente të caktuara të arrinte t’i mblidhte në PD, si në 2005, edhe njerëz që i kishin dalë me ‘tank’ përballë. Ka pasur këtë nuhatje. Por mënyra se si ai nuk e ka pranuar kurrë që krijesa kryesisht e tij, PD, të rivalizohej nga dikush aty, është thjesht një zakon i së vjetrës.”-tha Grida Duma
Më tej ajo tha se Partia Demokratike është në krizë të rëndë, por ka mundësi të shërohet. Ndërkohë, PS është më e kalbur dhe do ta vuajë më vonë. Por gjithçka varet nga PD, e cila sot nuk po arrin të kthejë kritikat ndaj Ramës në vota.
“Është e pafalshme, një gabim i rëndë që në këto momente Partia Demokratike po deklaron vetë vdekjen e saj klinike. Megjithatë, mund të shërohet pa asnjë diskutim. Dhe përsëri e them, diagnoza është më e keqe, por faza është më e mirë sesa ajo e Partisë Socialiste. Partia Socialiste do ta vuajë më keq këtë që po vuan sot Partia Demokratike. Kur? Pas dy apo tre vitesh, pas gjashtë vitesh, apo edhe pas një viti, kjo do të varet totalisht nga Partia Demokratike.
Për këtë arsye, herë pas here, e gjejmë veten duke kritikuar Partinë Demokratike, sepse e dimë një gjë, ne mund ta godasim sa të duam Edi Ramën dhe Partinë Socialiste, por nëse kjo nuk kthehet në votë, nuk ka asnjë vlerë. Goditjet tona dhe e çdo kolegu që bën opinion publik kthehet në votë vetëm kur Partia Demokratike, di të marrë produktin e medias, ta fusë në koshin e vet elektoral dhe ta kthejë në votë. Është shumë e qartë që Partia Demokratike nuk po di ta bëjë këtë.”- tha Duma.
Comments are closed.