Belinda Balluku i tregon “muskujt” Edi Ramës dhe kundërshtarëve brenda PS në varrimin e Servet Pëllumbit, shkon me grupin e saj të ministrave dhe deputetëve, Ballës i çahet grupi në mes, Bela ndez luftën mes socialistëve
Një ceremoni mortore që duhej të ishte e qetë, e mbushur me solemnitet dhe reflektim për figurën e Servet Pëllumbi, është kthyer dje papritur në një arenë të fortë përplasjesh politike brenda Partisë Socialiste. Në vend të heshtjes dhe respektit, ajo që u vu re ishte një demonstrim i hapur force nga ana e ish-zv/kryeministres Belinda Balluku (“Bela”). E shoqëruar nga një grup i organizuar ministrash dhe deputetësh, Balluku dukej sikur kishte marrë nën kontroll skenën. Prania e saj nuk kaloi si një pjesëmarrje e zakonshme, por si një mesazh i koduar për kundërshtarët e saj. Burime brenda Partisë Socialiste flasin për një rreshtim të qëllimshëm të ministrave që i ka “ushtarë dhe deputetëve socialist të Fierit, ku Balluku është drejtuese politike e PS, të vendosur nën “komandën” e saj. Ky veprim shihet si një sinjal i qartë drejt kryeministrit Edi Rama dhe figurave të tjera të larta të partisë.
Prapaskenat
Pas postimit të disa fotove nga mbledhja e fundit e grupit parlamentar socialist, ku ajo ekspozoi deputetët e ministrat që i ka pjesë të grupit të saj, dje ish-zv/kryeministrja publikoi foto nga homazhet për nder të z. Pëllumbi, ndërsa njëjtin mesazh të fortë duke treguar “muskujt”. Zonja Balluku është shfaqur sërish, këtë herë me një strukturë të organizuar që thuhet se e ka ndërtuar brenda Partisë Socialiste. Ministra dhe deputetë të afërt me të u rreshtuan krah saj, duke krijuar idenë e një “blloku” të mirëfilltë politik. Ky organizim është parë si një sfidë e drejtpërdrejtë ndaj balancave ekzistuese në parti. Ndërkohë, presioni ndaj saj po rritet ndjeshëm për shkak të hetimeve që lidhen me tenderat publikë. Dosjet për Unazën e Madhe dhe Tunelin e Llogarasë kanë shtrënguar lakun rreth saj dhe bashkëpunëtorëve. Por sa më shumë rritet presioni nga SPAK, aq më shumë rritet edhe karshillëku i Ballukut. Ajo duket e vendosur të mos tërhiqet, por përkundrazi të tregojë forcë. Në korridoret e PS flitet për një ndarje të qartë mes grupeve rivale.
Një pjesë e deputetëve po përpiqen të distancohen nga hija e korrupsionit që i faturohet asaj. Kurse një pjesë po luan lojën e saj, teksa bëjnë një demonstrim në PS për të hequr baltën e korrupsionit të Ballukut. Pra kjo tregon se ish-zv/kryeministrja Balluku po u përgjigjet kritikëve me një strategji të dukshme force dhe organizimi. Në këtë përplasje, përmendet edhe emri i i kryetarit të grupit parlamentar të Partisë Socialiste, Taulant Balla, grupi i të cilit thuhet se është çarë në mes. Kjo ka shtuar edhe më shumë tensionet dhe pasigurinë brenda socialistëve. Situata po merr formën e një beteje të hapur për kontroll dhe ndikim. Homazhet për Pëllumbin, në vend që të bashkonin socialistët, duket se i ndanë edhe më shumë. Çdo lëvizje tani interpretohet si pjesë e një loje më të madhe pushteti. Balluku, përmes veprimeve të saj, po jep sinjal se ende ka mbështetje të fortë. Ndërsa kundërshtarët e saj po përpiqen ta izolojnë politikisht, ajo po u tregon “dhëmbët”, duke ndezur luftën brenda mazhorancës socialiste. Në këtë klimë të ndezur, Partia Socialiste duket më e përçarë se kurrë. Ndërkaq theksojmë se ky veprim vjen në një kohë kur Balluku ndodhet nën hetim dhe është marrë e pandehur për “shkelje të barazisë në tendera”, në lidhje me dy prej projekteve më të diskutuara infrastrukturore në vend, si Unaza e Madhe dhe Tuneli i Llogarasë. Hetimet ndaj saj janë zgjeruar, duke shtuar presionin. Në këtë kontekst, gjesti i saj në homazhe duket si përpjekje për të ruajtur kontrollin dhe për të treguar se mbështetja brenda strukturave të partisë vijon, pavarësisht zhvillimeve ligjore.
Elisa Spiropali shkon e vetme për homazhet e Servet Pëllumbit
Nga ana tjetër, ajo që ra në sy dje ishte fakti se ish-ministrja Elisa Spiropali është shfaqur e vetme në homazhet për ndarjen nga jeta të profesorit të socialistëve, intelektualit të majtë Servet Pëllumbi. E pyetur për këtë episod, ish-ministrja e Jashtme dhe ish-kryetarja e Kuvendit të Shqipërisë, është shprehur se ajo ka qenë e vetme për shkak se “Unë i kam kryer homazhet si ish-kryetare e Kuvendit. Këtu vend kanë të gjithë, pavarësisht posteve të tyre.” Elisa Spiropali shmangu përpara gazetarëve “akuzat” ndaj socialistëve, në respekt edhe të ngjarjes ku po merrte pjesë, por mesa duket përjashtimi i saj nga Grupi Parlamentar i Partisë Socialiste sot është bërë fakt.
Comments are closed.